RUDINA HOXHA
TIRANA – Zyra ICE e Tiranës (Agjencia per nxitjen e ndërkombëtarizimit të Ndërmarrjeve të Vogla e të Mesme Italiane) organizoi ditën e premte në mjediset e Rogner Hotel Europapark një mbrëmje të veçantë për të prezantuar disa nga produktet më të mira të rajoneve të Italisë së Jugut, konkretisht Campania, Puglia dhe Sicilia në një përpjekje për ti promovuar ato në Shqipëri.
Këto produkte do ti ofrohen blerësve shqipëtarë për dy javë (6-21 shkurt, 2015), konkretisht në ambjentet e përcaktuara në qendrat tregtare, COIN dhe TEG. Kryesisht produktet e ekspozuara do të jenë nga sektorët e veshjeve, bizhuteritë dhe artikuj për shtëpinë.
Një iniciativë e tillë përkon edhe me Festën e 14 Shkurtit ku oferta të veçanta lidhur me këto produkte do të prezantohen.
Drejtoresha e Zyrës ICE për Tiranës, Zj. Gabriella Lombardi, në fjalën e saj, nënvizoi se ICE po i ndihmon këto kompani italiane në hapat e tyre të parë për të depërtuar edhe në tregun shqiptar. “Janë disa ndërmarrje që prezantohen në Shqipëri . Kemi të bëjmë me firma të vogla dhe të mesme italiane, disa prej tyre vijnë për herë të pare në tregun shqiptar. Ne i kemi ndihmuar dhe do të vijojmë t’i ndihmojmë në hapat e tyre të para këtu në Shqipëri, duke i dhënë mundësinë që të jenë prezente dhe me produktet e tyre për dy javë. Ato që këto firma kanë sjellë janë veshje për meshkuj dhe femra, bizhuteri, kostume plazhi, artikuj shtëpiakë në veçanti skulptura , shembullin e të cilave e kemi këtu për prezantim por edhe shandanë,” tha Zj. Lombardi, duke shtuar “Në COIN produktet do të prezantohen në disa hapësira, ndërsa në TEG do të jetë një hapësirë unike. Kemi investuar shumë për këtë eveniment për të ngjallur tek ju interesin që të shkoni për t’i parë me sytë tuaja të gjitha këto produkte nga afër, nga data 6 deri më 21 shkurt, përfshirë këtu edhe datën 14, ditën e Shën Valentinit ku në TEG do të ketë dhe një promocion special. Kështu shpresojmë që në këtë natë të prezantimit të shijoni shfaqjen.”
Disa nga kompanitë italiane që kanë shprehur interes për tregun shqiptar prezantuan produktet e tyre në një sfilatë promovuese. Ndër to ishin “Apulia Tessile” – veshje tekstile, “Aletex” se bashku me “All off” – rroba banje, “To be happy” – pizhame per femra e meshkuj si dhe bizhuteri të firmës Jais” dhe “Lapilli di lava”.
Zj. Lombardi është iniciatorja për përfshirjen e Shqipërisë në hartën e programit Piano Export Sud (Plani I Eksportit për Jugun) i cili ka si qëllim ndërkombëtarizimin e ndërrmarjeve të vogla dhe të mesme si dhe promovimin e produktit Italian në botë.
Italia mbetet partneri i parë tregtar i Shqipërisë me një kuotë prej 37 % dhe një vlerë prej më shumë se 2 miliardë euro. Në të njëjtën kohë, vendi ynë fqinj është investitori i parë i huaj në Shqipëri për nga numri i ndërmarrjeve italiane ose italo-shqiptare aktive.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English