Brenda vitit 2017 do të nisë ndërtimi i linjës së interkonjeksionit 400 kv Elbasan- Manastir. Shqipëria dhe Maqedonia tashmë e kanë gati financimin, dhe vetëm projekti do të marrë kohën e vet.
Ministri i Energjisë dhe Industrisë, Damian Gjiknuri, ka nënshkruar një memorandum bashkëpunimi me ministrin maqedonas të Ekonomisë, Bekim Nezirin në qytetin e Strugës.
“Projekti është duke ecur me të njëjtin ritëm në të dyja anët e kufirit. Besoj se deri në vitin 2017 do të fillojë ndërtimi konkret i kësaj linje për tu vënë në funksion në vitin 2018. Mjetet financiare për realizimin e këtij projekti janë siguruar nga të dyja shtetet ndaj projekti do të marrë vetëm kohën e tij për t’u kompletuar. Ky zhvillim e hap përspektivën për ndërlidhjen edhe të rrjetit elektroenergjetik shqiptar por edhe atij maqedonas e bullgar, në të ardhmen me një kabëll nënujor me Italinë dhe Bashkimin Evropian”, u shpreh z.Gjiknuri.
Ministri Neziri vlerësoi se realizimi i këtij projekti të rëndësishëm ndikon në përmirësimin e situatës së furnizimit me energji dhe në më shumë siguri energjetike për dy vendet tona, por edhe më tej për rajonin.
Lidhur me projektin e Radikës, ministri Neziri tha se Maqedonia nuk mund të ndërmarrë asnjë hap pa diskutuar me kolegët shqiptar për projekte të tilla që duan miratimin e të dy vendeve. Mes dy ministrave u diskutua edhe në lidhje me hapësirat e bashkëpunimit të mundshëm edhe në kuadër të projektit të Korridorit Jugor të Gazit.
/Top-Channel/
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
