Episodi më i ri i ThinkBig Podcast është tashmë i publikuar në YouTube dhe sjell në fokus një nga temat më të rëndësishme të kohës sonë: sigurinë e të dhënave dhe parave në epokën digjitale.
Në këtë bisedë, Ornaldo Naqellari, Chief Information Security Officer në JetBank, dhe Tomi Kallanxhi, ekspert i teknologjisë dhe digjitalizimit, ndajnë perspektivat e tyre mbi zhvillimin e bankingut digjital në Shqipëri, rreziqet reale dhe mënyrën sesi funksionon siguria në prapaskenë.
Diskutimi nis nga një realitet që tashmë po e përjetojmë çdo ditë: gjithnjë e më shumë shqiptarë po përdorin pagesat online dhe aplikacionet bankare. Por bashkë me këtë zhvillim, vjen edhe një pyetje thelbësore: sa të sigurt jemi?
Ornaldo ndalet te një element shumë i rëndësishëm, besimi. Ai thekson se në fund të ditës, gjithçka lidhet me të: “pa besim nuk ka biznes dhe garantori i besimit është siguria.”
Në vijim të bisedës, ai e bën edhe më konkrete sfidën kryesore që haset sot. Edhe pse kompanitë investojnë shumë në sisteme dhe teknologji, sipas tij problemi nuk është gjithmonë aty: ai thotë se një kompani mund të investojë qindra mijëra euro në sisteme, por gjithsesi hallka më e dobët mbetet njeriu.
Lexo edhe: Leadership Forum 2026: Kur Inteligjenca Artificiale kërkon lidership njerëzor!
Nga ana tjetër, Tomi e sheh zhvillimin nga këndvështrimi i tregut dhe sjelljes së përdoruesve. Ai shpjegon se besimi ndërtohet me kohën dhe eksperiencën: fillimisht përdoruesit bëjnë blerje të vogla online dhe, sapo ndihen të sigurt, rrisin gradualisht vlerën e transaksioneve.
Një moment interesant në bisedë është edhe mënyra sesi shpjegohet siguria në bankat digjitale. Ornaldo përdor një analogji shumë të thjeshtë dhe të kuptueshme: ai thotë se siguria ndërtohet në shtresa, njësoj si një qepë, ku çdo shtresë shton një nivel mbrojtjeje mbi tjetrin.
Diskutimi shkon më tej edhe te ndikimi i inteligjencës artificiale. Këtu, Ornaldo thekson një realitet të dyfishtë: nga njëra anë AI ndihmon profesionistët e sigurisë të jenë më të avancuar, por nga ana tjetër u jep edhe aktorëve keqdashës më shumë fuqi.
Në thelb, ajo që del nga kjo bisedë është një mesazh i qartë: teknologjia po bëhet çdo ditë më e sigurt, por kjo nuk mjafton nëse përdoruesit nuk janë të ndërgjegjshëm dhe të kujdesshëm në veprimet e tyre.
Ky episod nuk është thjesht një diskutim për bankat apo teknologjinë. Është një bisedë shumë reale për mënyrën sesi jetojmë sot, si paguajmë, si besojmë dhe si mbrojmë veten në një botë gjithnjë e më digjitale.
Episodin e plotë mund ta ndiqni tani në YouTube – BusinessMag Albania.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
