Bashkimi Europian është gati të hedhë një hap të ri në mbrojtjen e fëmijëve në internet, ndërsa një aplikacion për verifikimin e moshës në platformat online është tashmë i përfunduar dhe pritet të vihet së shpejti në përdorim. Lajmi u bë i ditur nga Ursula von der Leyen, e cila theksoi se institucionet europiane po ecin me ritëm të shpejtë për të forcuar rregullat që synojnë kufizimin e aksesit të të miturve në rrjetet sociale.
Ky zhvillim vjen në një moment kur gjithnjë e më shumë vende europiane po shqyrtojnë vendosjen e kufijve minimalë të moshës për përdorimin e rrjeteve sociale, të nxitur nga shqetësimet në rritje mbi ndikimin që këto platforma kanë në shëndetin dhe sigurinë e fëmijëve. Pas një vendimi të fortë në Australi për ndalimin e rrjeteve sociale për fëmijët, edhe Europa po lëviz në të njëjtin drejtim.
Aplikacioni i ri do të funksionojë si në telefon ashtu edhe në kompjuter dhe do t’u kërkojë përdoruesve të verifikojnë moshën përmes një dokumenti identifikimi, si pasaportë apo kartë identiteti, duke ruajtur anonimitetin e tyre. Sipas von der Leyen, ky mjet do t’u japë prindërve, mësuesve dhe kujdestarëve një mënyrë konkrete për të mbrojtur fëmijët nga përmbajtje të papërshtatshme dhe për të rritur përgjegjshmërinë e platformave digjitale.
Në të njëjtën linjë, drejtuesja për çështjet digjitale në BE, Henna Virkkunen, bëri të ditur se po planifikohet krijimi i një mekanizmi koordinues në nivel europian, për të siguruar që verifikimi i moshës të zbatohet në mënyrë të njëtrajtshme mes vendeve anëtare. Që prej vitit të kaluar, Komisioni Europian ka punuar për ndërtimin e një sistemi të harmonizuar të identifikimit digjital.
Megjithatë, sfidat teknike mbeten. Kontrolli i aksesit të fëmijëve në përmbajtje të kufizuara nuk është i lehtë për t’u zbatuar në praktikë. Eksperienca e Australisë ka treguar se pas vendosjes së kufizimeve, është rritur ndjeshëm përdorimi i VPN-ve, që u lejojnë përdoruesve të anashkalojnë këto barriera.
Edhe zyrtarët europianë e pranojnë se sistemi mund të anashkalohet përmes mjeteve të tilla, por theksojnë se qëllimi nuk është monitorimi i përdoruesve, por krijimi i një “barriere mbrojtëse” që redukton ekspozimin e paqëllimshëm të fëmijëve ndaj përmbajtjeve të papërshtatshme.
Ndërkohë, një vendim përfundimtar për një ligj të detyrueshëm në nivel të gjithë BE-së ende nuk është marrë. European Parliament ka miratuar më herët një raport që rekomandon vendosjen e moshës minimale 16 vjeç për përdorimin e rrjeteve sociale në të gjitha vendet anëtare. Vendimi final pritet të merret gjatë verës, pasi një panel i posaçëm për sigurinë e fëmijëve në internet të paraqesë rekomandimet e tij.
Europa duket se po hyn në një fazë të re të rregullimit të hapësirës digjitale, ku fokusi kryesor nuk është vetëm inovacioni, por edhe mbrojtja e përdoruesve më të rinj në një realitet gjithnjë e më kompleks online.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
