Alarm për përdoruesit e iPhone, Spyware i ri mund të hyjë në telefon pa asnjë klikim

Një valë e re sulmesh kibernetike po vë në pikëpyetje sigurinë e përdoruesve të iPhone, duke treguar se edhe pajisjet më të sigurta nuk janë më të paprekshme. Studiues nga Google, si dhe kompani të sigurisë si Lookout dhe iVerify, kanë zbuluar dy fushata të sofistikuara spyware që shfrytëzojnë dobësi në sistemin iOS.

Lexo gjithashtu: Mesazhi i fortë i Jensen Huang për të rinjtë: Kush nuk mëson AI, mbetet pas

Një prej mjeteve të identifikuara, i njohur si “Coruna”, dyshohet se është zhvilluar fillimisht për përdorim qeveritar dhe më pas ka përfunduar në duart e grupeve kibernetike. Sipas raportimeve, ai është përhapur përmes platformave të rreme financiare dhe kriptovalutash, duke infektuar pajisjet edhe pa ndërveprim nga përdoruesi.

Ndërkohë, një tjetër grup hakerësh, i njohur si “DarkSword”, përdor metoda të quajtura “watering hole”, ku infektohen automatikisht pajisjet e përdoruesve që vizitojnë faqe të caktuara, përfshirë portale lajmesh dhe platforma qeveritare.

Ekspertët paralajmërojnë se këto programe mund të aksesojnë një gamë të gjerë të dhënash personale, përfshirë mesazhe në aplikacione si WhatsApp dhe Telegram, vendndodhjen, kontaktet, historikun e thirrjeve dhe të dhëna të tjera sensitive. Sipas specialistëve, një rrezik i tillë nuk është më i kufizuar vetëm te objektivat qeveritare, por mund të prekë çdo përdorues.

Nga ana e saj, Apple ka reaguar duke deklaruar se dobësitë e shfrytëzuara janë adresuar në përditësimet më të fundit të iOS, ndërsa për pajisjet më të vjetra është ofruar një përditësim emergjent. Gjithashtu, shfletuesi Safari ka bllokuar domenet e dyshimta të përdorura në këto sulme.

Megjithatë, ekspertët theksojnë se nuk ekziston një mbrojtje absolute. Ata rekomandojnë që përdoruesit të mbajnë pajisjet të përditësuara, të aktivizojnë opsione shtesë sigurie si “Lockdown Mode” dhe të tregojnë kujdes ndaj platformave të panjohura.