Kush janë 4 anëtarët e rinj të Këshillit Mbikëqyrës të Bankës së Shqipërisë

Parlamenti votoi dje për emërimin e katër anëtarëve të rinj të Këshillit Mbikëqyrës të Bankës së Shqipërisë. Të propozuar nga Kuvendi janë Selami Xhepa dhe Holta Zaçaj, ndërsa nga Këshilli i Ministrave janë emëruar Ervin Mete dhe Jonida Prifti.

Po kush janë 4 anëtarët e rinj të Këshillit Mbikëqyrës të Bankës së Shqipërisë:

Selami Xhepa është aktualisht president dhe pedagog në Universitetin Europian të Tiranës, me një karrierë që përfshin detyra si deputet, këshilltar ekonomik i kryeministrit dhe ekonomist i lartë në Bankën e Shqipërisë. Holta Zaçaj ka përfunduar mandatin si anëtare dhe kryetare e Gjykatës Kushtetuese dhe ka shërbyer më parë si pedagoge, avokate dhe drejtore ligjore në Alpha Bank Albania.

Ervin Mete ka mbajtur detyrën e ministrit të Financave dhe të drejtorit ekzekutiv të Autoritetit të Mbikëqyrjes Financiare, ndërsa Jonida Prifti punon aktualisht si menaxhere për Shqipërinë, Gjeorgjinë dhe Lituaninë në Bankën e Këshillit të Europës për Zhvillim dhe ka eksperiencë më parë në Bankën e Shqipërisë.

Lexo edhe: Adem Morina: Oferta e integruar turistike Shqipëri–Kosovë, një nevojë urgjente

Emërimi i këtyre katër anëtarëve pritet të zhbllokojë funksionimin e Këshillit Mbikëqyrës, i cili ka qenë i paralizuar për rreth dy muaj. Për këtë arsye, vendimmarrja e institucionit ka qenë e paralizuar, duke shtyrë dy mbledhje të planifikuara dhe penguar miratimin e raportit të Politikës Monetare për tremujorin e parë të vitit, si dhe vendimet mbi normat bazë të interesit.

Një vend i fundit vakant mbetet ende i paplotësuar dhe kandidatët për të do të propozohen nga Këshilli i Ministrave. Kryeministria ka hapur një procedurë të re aplikimesh, duke i ftuar personat me arsim të lartë ekonomik ose juridik, përvojë profesionale në sektorin financiar dhe bankar, si dhe mbi pesë vite eksperiencë pune, të aplikojnë për vendin vakant. Afati i fundit për dorëzimin e aplikimeve është 11 mars 2026.