Drejtuesit kryesorë të gjigantëve globalë të inteligjencës artificiale do t’u bashkohen disa liderëve botërorë në Nju Delhi këtë javë, në kuadër të një samiti madhor për inteligjencën artificiale, në një moment kur India po përpiqet të tërheqë më shumë investime në këtë industri strategjike.
Vendi po shndërrohet gjithnjë e më shumë në një qendër të rëndësishme për kompanitë e AI-së, ndërsa Alphabet (Google), Microsoft dhe Amazon kanë angazhuar tashmë investime të kombinuara prej rreth 68 miliardë dollarësh në infrastrukturën e inteligjencës artificiale dhe cloud deri në vitin 2030. Zyrtarët indianë po e pozicionojnë “India AI Impact Summit”, i cili nisi të hënën, si një platformë për të forcuar zërin e vendeve në zhvillim në qeverisjen globale të inteligjencës artificiale. Nju Delhi shënon herën e parë që ky event global zhvillohet në botën në zhvillim.
“Tema e samitit është mirëqenie për të gjithë, lumturi për të gjithë, duke reflektuar angazhimin tonë të përbashkët për të vënë inteligjencën artificiale në shërbim të progresit njerëzor”, shkroi në platformën X kryeministri i Indisë, Narendra Modi.
Mes folësve kryesorë në samit janë drejtori ekzekutiv i Alphabet, Sundar Pichai, drejtori ekzekutiv i OpenAI, Sam Altman, drejtori ekzekutiv i Anthropic, Dario Amodei, kryetari i Reliance Industries, Mukesh Ambani, si dhe drejtori ekzekutiv i Google DeepMind, Demis Hassabis, i cili do t’i drejtohet samitit të enjten. Modi pritet të ndajë skenën atë ditë edhe me presidentin e Francës, Emmanuel Macron, i cili ndodhet në Indi në kuadër të një vizite zyrtare dypalëshe.
Banera të mëdhenj promovues të samitit, me portretin e Modit, janë vendosur përgjatë rrugëve kryesore të Nju Delhit, në një fushatë të gjerë komunikimi publik, për të cilën kryeministri njihet prej kohësh. India, e cila ende nuk ka prodhuar një model të avancuar të inteligjencës artificiale që të rivalizojë modelet lider nga SHBA-ja apo Kina, po e ndërton strategjinë e saj mbi avantazhin e zbatimit masiv të AI-së, më shumë sesa mbi zhvillimin e modeleve themelore. Në Raportin Ekonomik të Indisë, publikuar muajin e kaluar, qeveria këshillohet të fokusohet te “inovacioni i orientuar nga aplikimet”, në vend që të ndjekë garën për ndërtimin e modeleve gjigante të nivelit të lartë.
Lexo edhe: 700 miliardë dollarë për AI: A po e lë SHBA-ja Europën pa sovranitet digjital?
Kjo qasje mbështetet edhe nga adaptimi i gjerë brenda vendit. Me më shumë se 72 milionë përdorues ditorë të ChatGPT deri në fund të vitit 2025, India është tashmë tregu më i madh i OpenAI në botë. Megjithatë, përhapja e shpejtë e AI-së po kërcënon vende pune në sektorin indian të IT-së, me vlerë rreth 283 miliardë dollarë. Sipas bankës investuese Jefferies, qendrat e thirrjeve (call centers) mund të përballen me një rënie deri në 50% të të ardhurave deri në vitin 2030, si pasojë e adoptimit të AI-së.
Trajnerë kriketi me AI dhe hotele luksoze shumë të shtrenjta
Samitet e mëparshme globale për inteligjencën artificiale, të mbajtura në Bletchley Park në Mbretërinë e Bashkuar në vitin 2023, në Seul në vitin 2024 dhe në Paris në vitin 2025, janë dominuar nga angazhime për sigurinë, premtime vullnetare nga korporatat dhe deklarata për qeverisjen e AI-së, megjithëse kritikët kanë theksuar se ato prodhuan pak rezultate konkrete dhe të zbatueshme. Më shumë se 250 mijë vizitorë pritet të marrin pjesë në samitin në Indi, me mbi 300 ekspozues në një panair prej 70 mijë metrash katrorë, i mbajtur në Bharat Mandapam, një kompleks gjigant konferencash me vlerë rreth 300 milionë dollarë.
Fluksi i mijëra delegatëve ndërkombëtarë ka bërë që çmimet e hoteleve luksoze në Delhi të rriten ndjeshëm, duke shkaktuar reagime të shumta në rrjetet sociale. Një suitë në hotelin Taj Palace, që normalisht kushton rreth 2,200 dollarë për natë, ishte listuar javën e kaluar me mbi 33,000 dollarë për natë.
Gjykata e Lartë e Indisë lëshoi të shtunën një njoftim, duke lejuar avokatët të paraqiten përmes videokonferencës gjatë javës së samitit, për shkak të pritjes së trafikut të rënduar rreth godinës së gjykatës, në lidhje me zhvillimin e këtij eventi madhor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
