Njerëzit që jetojnë me obezitet kanë një rrezik 70% më të lartë për raste të rënda të sëmundjeve infektive, sipas një studimi të ri.
Probabilitetet për t’u shtruar në spital ose për të vdekur nga një sëmundje infektive – siç janë gripi, COVID-19, pneumonia dhe gastroenteriti – rriten tek njerëzit me obezitet, sipas një studimi të ri të botuar në The Lancet.
“Ndërsa pritet që normat e obezitetit të rriten në nivel global, do të rritet edhe numri i vdekjeve dhe shtrimeve në spital nga sëmundjet infektive të lidhura me obezitetin”, tha autorja e studimit, Solja Nyberg nga Universiteti i Helsinkit.
Ajo shtoi se, për të zvogëluar rrezikun e infeksioneve të rënda, si dhe probleme të tjera shëndetësore të lidhura me obezitetin, nevojiten urgjentisht politika që mbështesin stilet e jetesës së shëndetshme dhe humbjen e peshës, duke përfshirë aksesin në ushqim të përballueshëm dhe të shëndetshëm dhe mundësitë për aktivitet fizik.
Lexo edhe: Ndjesia e humbjes pas leximit, psikologjia e “hangover”-it të librave
Studimi analizoi të dhëna nga mbi 67,000 të rritur në Finlandë dhe mbi 470,000 të rritur në të dhënat e Biobank në Mbretërinë e Bashkuar për të parë marrëdhënien midis obezitetit dhe sëmundjeve të rënda infektive.
Studiuesit matën indeksin e masës trupore (BMI) të pjesëmarrësve në fillim të studimit dhe i klasifikuan ata në tre grupe të ndryshme: peshë e shëndetshme, mbipeshë dhe obezë.
Njerëzit me obezitet u klasifikuan më vonë si klasa I (30–34,9 kg/m2), klasa II (35–39,9 kg/m2) ose klasa III (≥40,0 kg/m2).
Studimi zbuloi se njerëzit me obezitet kishin një rrezik 70 për qind më të lartë të shtrimit në spital ose vdekjes nga çdo sëmundje infektive krahasuar me njerëzit me një peshë të shëndetshme, ata me një BMI midis 18.5 dhe 24.9.
Studiuesit panë se rreziku rritej vazhdimisht me rritjen e peshës trupore. Njerëzit me obezitetin më të rëndë – BMI ≥40 kg/m² – kishin tre herë më shumë rrezik se njerëzit me një peshë të shëndetshme.
“Zbulimi ynë se obeziteti është një faktor rreziku për një gamë të gjerë sëmundjesh infektive sugjeron se mund të përfshihen mekanizma të gjerë biologjikë”, tha Mika Kivimäki, udhëheqëse e studimit në University College London.
Ai shtoi se është e besueshme që mbipesha dobëson aftësinë e sistemit imunitar për t’u mbrojtur kundër baktereve, viruseve, parazitëve ose kërpudhave infektive, gjë që mund të rezultojë në sëmundje më serioze.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
