Shumica e europianëve pritet të përballen me rritje të shpejtë të çmimeve të ushqimeve gjatë vitit 2026, sipas një sondazhi të fundit të ING Consumer Research, pavarësisht se Banka Qendrore Europiane (BQE) pret zbutje të inflacionit ushqimor.
Të dhënat e Eurostat tregojnë se në vitin 2025 çmimet e ushqimeve dhe pijeve joalkoolike u rritën me 3.3%, mbi mesataren e inflacionit të përgjithshëm prej 2.5%. Në eurozonë, BQE parashikon se inflacioni i ushqimeve do të ulet gradualisht dhe do të stabilizohet pak mbi 2% drejt fundit të vitit 2026.
Megjithatë, konsumatorët ende ndihen të prekur nga rritjet e fundit. 58% e të anketuarve në gjashtë vende europiane përfshirë Gjermani, Spanjë, Holandë, Belgjikë, Poloni dhe Rumani thanë se presin që çmimet e ushqimeve të rriten më shpejt gjatë 12 muajve të ardhshëm. Vetëm 14% nuk e ndajnë këtë pritshmëri.
Shqetësimi është më i madh në Rumania (73%), Belgjikë (66%) dhe Holandë (64%), ndërsa Spanja regjistron nivelin më të ulët, me 39% të të anketuarve që presin rritje më të shpejtë. Rritja e besimit të konsumatorëve në Spanjë lidhet me rritjen ekonomike prej 2.8% në 2025, çmime më të ulëta energjie dhe rritje të pagave reale.
Lexo edhe: Nga ChatGPT te Tinder, ja çfarë shkarkuan më shumë europianët në 2025-ën
Kur bëhet fjalë për fuqinë blerëse, pesimizmi mbizotëron. Në total, 39% e të anketuarve nuk presin përmirësim të fuqisë blerëse, krahasuar me 29% që janë optimistë. Gjermania dhe Belgjika janë më pesimiste, me 53% dhe 50%, përkatësisht, që nuk presin rritje të fuqisë blerëse, ndërsa Spanja mbetet më optimiste, me 52% që presin përmirësim.
Sipas analistëve, ekziston një korrelacion i fortë mes inflacionit ushqimor dhe pjesës së shpenzimeve familjare që shkon për ushqime. Kjo do të thotë se disa vende, si Rumani ku 23.1% e buxhetit shpenzohet për ushqim dhe inflacioni i ushqimeve ishte 6.8% në 2025, ndihen më të goditura.
Sondazhi tregon se, edhe pse presionet inflacioniste mund të ngadalësohen, shumica e europianëve janë mendërisht të përgatitur për rritje të mëtejshme të çmimeve të ushqimeve gjatë vitit 2026.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
