Disney ka emëruar Josh D’Amaro, aktualisht kryetar i Disney Experiences, si CEO-n e saj të ardhshëm, duke i dhënë fund një procesi të gjatë dhe shumë të ndjekur për pasardhësin e Bob Iger.
Emërimi i D’Amaro-s hyn në fuqi më 18 mars, gjatë mbledhjes vjetore të kompanisë. Iger do të vazhdojë të jetë këshilltar i lartë dhe anëtar i bordit deri në largimin e tij përfundimtar nga kompania më 31 dhjetor. Ky është rasti i dytë brenda gjashtë viteve që Disney përzgjedh një pasues për Iger. Përpjekja e mëparshme, emërimi i Bob Chapek, u shndërrua në një krizë të hapur qeverisjeje korporative, që çoi në rikthimin e Iger në krye të kompanisë në vitin 2022. “Josh D’Amaro është një lider i jashtëzakonshëm dhe personi i duhur për të qenë CEO-ja i ardhshëm i Disney-t,” tha Iger në një deklaratë zyrtare. “Ai ka një ndjeshmëri të lindur ndaj brand-it Disney dhe një kuptim të thellë të asaj që rezonon me audiencën, të kombinuar me rigorozitetin operacional të nevojshëm për të realizuar projektet tona më ambicioze.”
Një proces i gjatë përzgjedhjeje
Për disa vite me radhë, bordi i Disney-t, i drejtuar nga ish-CEO i Morgan Stanley, James Gorman, ka shqyrtuar kandidatë të shumtë, kryesisht nga radhët e drejtuesve të lartë të kompanisë. Katër raportuesit direkt të Iger – D’Amaro, drejtuesi i ESPN Jimmy Pitaro, si dhe bashkë-drejtuesit e Disney Entertainment Dana Walden dhe Alan Bergman, u intervistuan nga komiteti i pasardhësve që në vitin 2024. Në muajt e fundit, gara ishte ngushtuar mes D’Amaro dhe Dana Walden. Walden u emërua njëkohësisht presidente dhe shefe kreative (Chief Creative Officer), rol i ri që do të fokusohet ekskluzivisht në motorin kreativ dhe përmbajtjen e Disney-t, duke raportuar drejtpërdrejt te D’Amaro. “Nëse mendon se çfarë është zemra e Disney-t, ajo është kreativiteti,” u shpreh Gorman për CNBC. “Është pasuria e jashtëzakonshme e pronësisë intelektuale e ndërtuar ndër dekada.”
Lexo edhe: Pagat minimale në Europë për këtë vit, Shqipëria e fundit mes vendeve kandidate
Sfida përpara dhe pesha e trashëgimisë së Iger
D’Amaro merr drejtimin e Disney-t në një moment kompleks. Edhe pse kompania raportoi fitime dhe të ardhura mbi pritshmëritë, të mbështetura nga parqet tematike dhe streaming, aksionet e Disney-t ra me 7%. Njësia Experiences, që përfshin parqet tematike, resortet dhe linjat e kroçerave, gjeneroi për herë të parë mbi 10 miliardë dollarë të ardhura tremujore, duke u shndërruar në shtyllën më të fortë financiare të kompanisë.
Disney po planifikon:
- një park të ri tematik dhe resort në Abu Dhabi,
- investime prej 60 miliardë dollarësh në parqet tematike gjatë dekadës së ardhshme,
- si dhe dominimin e box office-it në vitin 2025.
Megjithatë, sfida kryesore mbetet biznesi i medias dhe tranzicioni nga televizioni tradicional drejt streaming-ut fitimprurës.
Pasuesi i Bob Iger: një rol që nuk fal gabime
Bob Iger ka drejtuar Disney-n për rreth 20 vite, në dy mandate. Në periudhën e tij të parë, ai e transformoi kompaninë përmes blerjeve strategjike dhe lançimit të Disney+, duke e kthyer Disney-n në një superfuqi globale të argëtimit.
Rikthimi i tij në vitin 2022 solli:
- shkurtime kostosh prej 5.5 miliardë dollarësh,
- ristrukturim organizativ,
- rikthim në krye të box office-it,
- dhe stabilizim të biznesit të streaming-ut.
“I rëndësishëm sa vetë drejtimi i kompanisë është procesi i pasardhësisë,” ka deklaruar më herët Iger, duke theksuar se qëllimi i tij ishte të linte Disney-n të fortë për liderin e ardhshëm. Tani, kjo përgjegjësi bie mbi Josh D’Amaro – njeriun që do të udhëheqë Disney-n në kapitullin e saj të ardhshëm.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
