Këtë muaj, NASA synon të nisë katër astronautë në një mision historik 10-ditor rreth anës së largët të Hënës, duke i vendosur ata në majë të një rakete gjigante 32-katëshe. Misioni Artemis II shënon kthimin e njerëzve drejt Hënës për herë të parë që nga Apollo 17, 53 vite më parë.
Për NASA-n, ky mision është një hap vendimtar drejt objektivit afatgjatë: rikthimin e astronautëve në sipërfaqen hënore, krijimin e një pranie të qëndrueshme atje dhe përdorimin e Hënës si portë për misionet e ardhshme drejt Marsit. Pas disa vonesash, Presidenti Donald Trump ka vendosur si synim rikthimin e amerikanëve në Hënë deri në vitin 2028, ndërsa Kina planifikon një ulje hënore deri në vitin 2030, duke e kthyer Artemis II në një pikë kyçe të garës hapësinore të shekullit XXI.
Një hap i vogël për raketën, një hap i madh për njerëzimin
Rreth dy javë më parë, në Qendrën Hapësinore Kennedy në Florida, raketa SLS, me peshë mbi 3.5 milionë paund, u zhvendos ngadalë nga godina e montimit drejt platformës së nisjes. E kurorëzuar nga kapsula Orion, raketa u transportua mbi një mjet gjigant të epokës Apollo, duke përshkuar rreth katër milje me një shpejtësi maksimale më pak se një milje në orë.
Qindra punonjës të NASA-s, të cilët kanë kontribuar në ndërtimin e raketës më të fuqishme ndonjëherë, sollën edhe familjet e tyre për të parë nga afër këtë moment historik. Të pranishëm ishin edhe katër astronautët që do të realizojnë fluturimin rreth Hënës. Ata u takuan në platformën legjendare Launch Pad 39B.
Kur u pyet se çfarë ndiente përballë raketës, komandanti i misionit, Reid Wiseman, u shpreh: “Një ndjenjë krenarie e jashtëzakonshme. Krenari për vendin dhe për partneritetet ndërkombëtare që e bënë të mundur këtë.”
Lexo edhe:NASA gati të dërgojë sërish astronautë rreth Hënës
Ekuipazhi i Artemis II
Reid Wiseman është komandanti i misionit. Në ekuipazh janë gjithashtu:
- Victor Glover, piloti i misionit
- Christina Koch dhe Jeremy Hansen, specialistë të misionit
Koch, Wiseman dhe Glover kanë përjetuar më parë jetën në hapësirë në bordin e Stacionit Ndërkombëtar Hapësinor. Ndërsa Hansen, pilot luftarak me përvojë nga Kanadaja – një nga partnerët më të vjetër hapësinorë të SHBA-së – do të fluturojë për herë të parë në orbitë.
Christina Koch e përshkruan raketën si diçka më shumë sesa teknologji: “Është një monument që tregon se njerëzimi ka vendosur të investojë burime për të dërguar njerëz përtej planetit tonë. Është diçka e jashtëzakonshme dhe jam mirënjohëse që jam pjesë e saj.”
Themeli për eksplorimin e qëndrueshëm të Hënës
Përtej simbolikës, Artemis II vendos themelet për eksplorimin afatgjatë të Hënës, për ndërtimin e bazave hënore dhe për misionet e ardhshme të ekuipazhuara drejt Marsit.
Jeremy Hansen e përmbledh filozofinë e misionit me këto fjalë: “Të fluturosh rreth anës së errët të Hënës, të shohësh Tokën duke lindur dhe ta ndash atë pamje me botën, është shpresë, dhe një kujtesë e fuqishme se çfarë mund të arrijmë kur punojmë së bashku.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
