Imagjino të fitosh miliarda dollarë pa pasur restorante, pa ndërtuar hotele, pa pasur makina, pa prodhuar muzikë apo video. Çmenduri? Jo, është realiteti i disa prej kompanive më të mëdha që sot kanë ndryshuar mënyrën si jetojmë.
DoorDash
DoorDash arriti 8 miliardë dollarë të ardhura, pa hapur asnjë restorant. Ata thjesht krijuan një aplikacion që lidh njerëzit me ushqimin që duan, në kohën që duan. Sekreti? Logjistikë e zgjuar dhe teknologji që sjellin kuzhinën tek dera jote.
Airbnb
Me 9 miliardë dollarë, Airbnb tregoi se nuk ke nevojë të zotërosh një hotel për të qenë gjigant në turizëm. Ata thjesht shndërruan dhomat e thjeshta në përvoja unike. Një apartament në Tiranë apo një vilë në Bali, përmes aplikacionit bëhen destinacione për udhëtarë nga e gjithë bota.
Spotify
Spotify bëri 14 miliardë dollarë, pa regjistruar asnjë këngë. Ata e kthyen muzikën në shërbim: nuk blen më albume, por ke qasje te çdo këngë, kudo dhe kurdo. Nga modelet e abonimit te reklamat, Spotify ndërtoi një industri të re konsumi muzikor.
YouTube
YouTube fitoi 31 miliardë dollarë pa prodhuar vetë asnjë video. Miliona krijues furnizojnë platformën çdo ditë, ndërsa YouTube u jep atyre audiencë dhe fitime përmes reklamave. Një ekosistem që u bë rruga më e madhe e shprehjes digjitale në botë.
Uber
Uber është shembulli më i madh: 37 miliardë dollarë, pa zotëruar flotë makinash. Një aplikacion që lidhi shoferët me pasagjerët, dhe transporti urban kudo në botë nuk është më i njëjti.
Këto kompani kanë diçka të përbashkët:
-
Nuk zotërojnë asetin bazë.
-
Kanë krijuar platforma që lidhin ofertën me kërkesën.
-
Përdorin fuqinë e komunitetit.
-
Fitimet e tyre nuk varen nga fabrika apo ndërtesa, por nga teknologjia dhe të dhënat.
E ardhmja nuk është më te pronësia, por te aksesi. Bizneset që dinë të ndërtojnë ura, jo mure, janë ato që do të fitojnë.
Pyetja që mbetet është:
Cila do të jetë platforma e radhës që do të bëjë miliarda pa zotëruar asgjë?
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
