Nëse ju ka ndodhur ndonjëherë të përgjigjeni në një email të dielën në darkë, të hiqni dorë nga një tarifë vonese “për të qenë i sjellshëm”, apo të përshtatni sërish orarin tuaj sipas ndryshimeve të klientit, nuk jeni të vetëm. Vendosja e kufijve si sipërmarrës shpesh duket e pamundur.
Natyrisht, dëshironi të jeni të gatshëm, fleksibël dhe ndihmues. Por, nëse nuk bëni kujdes, kjo fleksibilitet kthehet në mbingarkesë dhe përfundimisht në pakënaqësi. Në fakt, 42% e pronarëve të bizneseve të vogla raportojnë se përjetojnë lodhje dhe pakënaqësi ndaj biznesit të tyre. E vërteta është se vendosja e kufijve nuk nënkupton humbje klientësh. Përkundrazi, kufijtë e qartë rrisin besimin, profesionalizmin dhe kënaqësinë e klientëve kur zbatohen siç duhet. Ashtu si çdo marrëdhënie tjetër, edhe bashkëpunimet me klientët kanë nevojë për kufij të shëndetshëm. Të gjithë përpiqemi të japim më shumë nga vetja. Por kur kjo bëhet normale dhe jo përjashtim, krijohet një cikël që sjell lodhje, pakënaqësi dhe, në raste ekstreme, djegie profesionale tek ju dhe ekipi juaj. Vendosja e kufijve të qartë mes jush dhe klientëve ndihmon të krijoni një ekuilibër të shëndetshëm që u jep hapësirë anëtarëve të ekipit të përmbushin pritshmëritë në mënyrë të drejtë për të dyja palët. Nuk është e qëndrueshme që t’i përshtateni çdo kërkese të klientit duke punuar jashtë orarit. Po, ndonjëherë kërkohet një përpjekje shtesë, por kjo nuk duhet të kthehet në normë. Nëse kërkesat e klientëve ushtrojnë presion të tepruar mbi orarin tuaj, është momenti të komunikoni qartë kufijtë dhe të menaxhoni pritshmëritë.
Si ta bëni këtë:
-
Kanale të qarta komunikimi: dalloni çështjet urgjente nga ato që mund të presin. Përdorni email për kërkesa të zakonshme dhe mjete menaxhimi projektesh për detyra urgjente.
-
Pritshmëri për kohën e përgjigjes: bëhuni transparent për kohën që ju dhe ekipi keni në dispozicion. Nuk ka pse të ketë pritshmëri për përgjigje të menjëhershme.
-
Orar dhe takime të qëndrueshme: mbani një ritëm të rregullt me orare fikse pune dhe takime javore apo dyjavore.
-
Calendar blocking: inkurajoni ekipin të bllokojë kohë për punë të thelluar dhe kreative, pa ndërprerje.
Lexo edhe:‘De-banking’, kur llogaria juaj mund të mbyllet pa paralajmërim
Vendosni kufij që nga fillimi
Çdo projekt duhet të nisë me qartësi.
-
Sqaroni saktësisht punën që do të kryeni: përcaktoni objektivat, afatet dhe dorëzimet për të shmangur keqkuptime dhe “scope creep”.
-
Shpjegoni procesin: ndani me klientin mënyrën se si funksionon ekipi juaj, kush është përgjegjës për miratime dhe cilat janë fazat e projektit.
-
Përkujtoni marrëveshjet kur është e nevojshme: nëse kërkesat dalin jashtë rregullave të përcaktuara, mos hezitoni t’ia kujtoni klientit.
Marrëdhënia me klientin duhet të jetë partneritet, jo marrëdhënie të njëanshme. Nëse ndjeni që klienti po merr shumë kontroll, ruani qetësinë, por qëndroni të vendosur.
Strategji praktike:
-
Mbani dialog të hapur me mirëkuptim dhe empati.
-
Mbështesni rekomandimet me të dhëna dhe fakte, jo vetëm me ndjesi.
-
Jini të gatshëm për kompromis aty ku është e arsyeshme, por pa sakrifikuar kontrollin tuaj profesional.
Mësoni të thoni “Jo”
Është e vështirë të refuzosh një klient, por ndonjëherë është e domosdoshme. Nëse kërkesa nuk është në përputhje me marrëveshjen, apo kërkon kohë dhe energji të tepërt, “jo” është përgjigjja e duhur.
Si ta bëni këtë pa prishur marrëdhënien:
-
Sillni alternativa të arsyeshme që ruajnë ekuilibrin.
-
Shpjegoni arsyet me transparencë, qoftë kufizime kohe, burimesh apo prioritete strategjike.
Mos lejoni ndjenjën e fajit t’ju pengojë. Klientët që nuk respektojnë kufijtë tuaj mund të mos jenë partnerët e duhur për biznesin tuaj. Kufijtë nuk janë pengesë, por mjet për marrëdhënie të shëndetshme dhe afatgjata. Ata ju mbrojnë ju dhe ekipin tuaj, rrisin profesionalizmin dhe vendosin bazat për një bashkëpunim të qëndrueshëm. Nëse vendosni kufij të qartë që nga fillimi dhe i respektoni me përpikëri, jo vetëm që nuk humbni klientë, por fitoni më shumë besim dhe respekt.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
