Era e udhëtimeve pa shofer nis në Europë, Lyft zbulon planet për 2026-ën

Robotaksitë mund të jenë të disponueshme në Gjermani dhe Mbretërinë e Bashkuar përmes aplikacionit Lyft që vitin e ardhshëm.

Kompania amerikane e shërbimit të udhëtimit me makinë, Lyft, ka njoftuar një partneritet me gjigantin kinez të inteligjencës artificiale, Baidu, për të sjellë në Europë taksi autonome që në vitin 2026. Sipas njoftimit për shtyp të publikuar të hënën, automjetet e brezit të gjashtë Apollo Go të Baidu-së, të pajisura me teknologji të avancuar për drejtim autonom, do të ofrohen për udhëtime përmes aplikacionit Lyft në Gjermani dhe Mbretërinë e Bashkuar – në pritje të miratimeve rregullatore.

Në një postim në platformën sociale X, Baidu bëri të ditur se planifikon ta zgjerojë flotën e saj në “mijëra automjete” në të gjithë Europën gjatë viteve të ardhshme.

Ky zhvillim vjen vetëm disa ditë pasi Lyft njoftoi blerjen e aplikacionit evropian për taksi FREENOW, pronë e BMW-së dhe Mercedes-Benz-it, për një shumë prej afërsisht 200 milionë dollarësh (172.8 milionë eurosh), duke zgjeruar praninë e saj në 180 qytete në nëntë vende të Europës.

Lexo edhe: Tesla propozon t’i japë Elon Musk 29 miliardë dollarë që të mbetet CEO

Lyft, që deri më tani ka pasur një prani shumë të kufizuar në tregun europian, deklaroi se do të fokusohet fillimisht te Gjermania dhe Mbretëria e Bashkuar, kryesisht për shkak të pranisë së krijuar nga FREENOW në këto vende, si dhe për shkak të “marrëdhënieve të thelluara me rregullatorët lokalë dhe operatorët e taksive”.

Për Baidu-n, ky partneritet përfaqëson një tjetër hap strategjik në përpjekjen për të zgjeruar praninë jashtë Kinës. Vetëm muajin e kaluar, kompania kishte njoftuar një marrëveshje me Uber për të sjellë veturat autonome në tregjet jashtë Shteteve të Bashkuara dhe Kinës, me një fokus të veçantë në Lindjen e Mesme, përfshirë qytete si Dubai dhe Abu Dhabi si dhe në disa vende të Azisë.