Kukullat Labubu nuk gjenden më, edhe në dyqanin gjigant Pop Mart në Shanghai, ku klientëve u thuhet se duhet të presin me javë. Kukullat me fytyrë të vrenjtur shiten për 20 dollarë, por një lloj i rrallë u shit për 150,000 dollarë në ankand më 10 qershor. Tashmë, ato adhurohen jo vetëm nga fëmijët kinezë, por edhe nga yje të showbiz-it si David Beckham e Rihanna.
Ky popullaritet e ka rritur çmimin e aksioneve të Pop Mart me 180% që nga fillimi i vitit. Kompania është pjesë e një vale popullariteti në rritje të markave kineze të konsumit, që po njihen si në tregun vendas ashtu edhe jashtë vendit. Për vite me radhë, konsumatorët kinezë u kthyen nga markat perëndimore për modë, kozmetikë dhe ushqim. Tani, ata po preferojnë markat vendase, shpesh të cilësisë së lartë dhe me çmime më të ulëta.
Lexo edhe:Mektrin Marine, pika e re e referencës për jetën e luksit mbi det
Në një kohë me rritje të ngadaltë ekonomike dhe konsum më të kujdesshëm, markat kineze po përfitojnë. Kafene si Cotti dhe Luckin po konkurrojnë Starbucks me kafe cilësore, por më të lira. Marka e bizhuterive Laopu Gold ofron produkte luksoze më të lira se Tiffany & Co. Ndërsa Songmont sfidon çantat e huaja me fushata reklamuese në aeroporte.
Sidoqoftë, nuk bëhet fjalë vetëm për zgjedhje ekonomike. Shumë konsumatorë janë të gatshëm të paguajnë njësoj ose më shumë për produkte vendase. Chagee, një zinxhir çaji premium që u listua në bursën e New Yorkut në prill, shet çaj për 2-3 dollarë, sa edhe Starbucks. Edhe sektori i makinave elektrike luksoze (200–400 mijë juanë) po dominohet nga markat vendase si NIO dhe Li Auto.
Një faktor kyç është ndryshimi i perceptimit ndaj markave të huaja. Laopu Gold, me bizhuteri të frymëzuara nga kultura kineze, ka pasur një rritje të ndjeshme të shitjeve dhe vlerës së aksioneve (mbi 2,000% që nga listimi në bursën e Hong Kong-ut). Konsumatorët e rinj janë më të informuar, falë rrjeteve sociale, dhe nuk e shohin më origjinën e huaj si garanci cilësie. Shumë gra të reja kërkojnë përbërësit aktivë të produkteve të huaja në markat kineze, por me çmime më të ulëta.
Kjo ka ndihmuar edhe suksesin e markës së kozmetikës Mao Geping, e cila pas IPO-së në dhjetor ka parë rritje me rreth 250%. Ajo është marka e parë kineze në listën e dhjetë markave më të shitura të kozmetikës luksoze në vend.
Markat vendase kanë një strategji të ndryshme: fillojnë në qytete më të vogla, jo në Pekin apo Shangai. Chagee nisi në Kunming; Mixue u rrit nga një kioskë, në një nga zinxhirët më të mëdhenj të pijeve në vend. Edhe zinxhiri i hoteleve H World po zgjerohet në qytetet e treta e të katërta, ku konsumi po rritet më shpejt se në metropolet e mëdha.
Në vitin 2024, shitjet e mallrave të konsumit të shpejtë u rritën me 5.5% në qytete me më pak se 1 milion banorë, ndërsa ranë me 4.6% në qytetet e mëdha, sipas Bain. Kjo qasje ka ndikuar që zinxhirët kinezë të jenë më të mbushur sesa rivalët e huaj: H World ka normë rezervimi mbi 80%, ndërsa Marriott nën 70%.
Sfidat për markat perëndimore janë reale. Starbucks dhe Häagen-Dazs po kërkojnë investitorë vendas. Ndërkohë, markat kineze po zgjerojnë praninë globale: Pop Mart ka dyqane në mbi 20 vende, përfshirë 37 në SHBA; Chagee synon mbi 1,300 dyqane jashtë Kinës deri në 2027. Për dekada, trendet perëndimore influencuan konsumatorin kinez. Tani duket se është Kina ajo që po udhëheq modën globale.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
