Nga Eni Muça– Në një moment historik për komunitetin shqiptar në Shtetet e Bashkuara, Ardhmir Malziu është përfshirë për herë të parë në listën prestigjioze “Bronx Power 100”, e përgatitur nga City & State New York, duke u renditur si një nga 100 figurat më me ndikim në Bronx për vitin 2025.
I lindur në SHBA nga prindër shqiptarë dhe i rritur në zemër të Bronx-it, Ardy është sot një ndër zërat më aktivë dhe përfaqësues të brezit të ri të shqiptarëve në politikën lokale amerikane. Ai mban postin e District Leader për zonën e 80-të në Partinë Demokratike të Bronx-it, duke qenë kështu i vetmi zyrtar shqiptar-amerikan i zgjedhur në qytetin e Nju Jorkut. Po ashtu, Ardhmiri ushtron rolin e Koordinatorit të Komunitetit në Bronx Community Board 8, ku kontribuon drejtpërdrejt në ndërtimin e politikave vendore dhe mbështetjen e komunitetit në zona të tilla si Riverdale, Fieldston dhe Marble Hill.
Lexo edhe:Episodi i 4 i Think Big: Green Coast Hotel | MGallery Collection – Ku mali përqafon detin!
Me një përvojë të mëparshme pranë Këshillit Bashkiak të Nju Jorkut dhe me eksperiencë në New York Yankees, ai ka ndërtuar një profil të fuqishëm si aktivist, strateg komuniteti dhe lider lokal. Kontributi i tij në përfshirjen e të rinjve dhe grupeve të margjinalizuara në proceset demokratike, përmes edukimit për votim dhe angazhimit si punonjës të qendrave të votimit, ka qenë një ndër arsyet kryesore të përfshirjes në listën e këtij viti. Malziu ka organizuar gjithashtu një sërë eventesh që nderojnë trashëgiminë kulturore shqiptare, duke e kthyer Bronx-in në një qendër të gjallë të krenarisë shqiptare në diasporë.
Në fjalën e tij pas publikimit të listës, ai shprehet: “Jam i nderuar që jam përfshirë në listën Bronx Power 100 për vitin 2025! Mirënjohës që shërbej si Udhëheqës Distrikti në Bronx dhe krenar që qëndroj krah liderëve të përkushtuar për të ngritur komunitetet tona. Bronx-i po ngrihet dhe ne sapo kemi filluar!”
Ardhmir Malziu nuk është vetëm një emër në listë, ai përfaqëson një brez të ri liderësh që nuk harrojnë rrënjët, por i kthejnë ato në forcë për ndryshim. Historia e tij është një frymëzim për shqiptarët kudo që ndodhen dhe një kujtesë e fuqishme se përfaqësimi ka rëndësi. Për bizneset, për të rinjtë dhe për diasporën, ai është një shembull i qartë i asaj që mund të arrihet me përkushtim, identitet të fortë dhe dëshirë për të ndikuar pozitivisht në komunitet.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
