Mos e prano menjëherë. Mos u tërhiq pa folur. Negociata për pagën është jo vetëm e mundur, por e domosdoshme.
Në momentin që merr një ofertë pune me një pagë më të ulët nga ç’e prisje, ndodh një përplasje e menjëhershme, ta pranosh në heshtje apo të kërkosh më shumë? Shumë profesionistë zgjedhin njërën prej këtyre skajeve, por zgjidhja më e zgjuar është diku në mes, një bisedë e qartë dhe strategjike për pagën.
Lexo gjithashtu: Media online në Shqipëri, ende pa një bilanc të qartë
Në një botë ku zhvillimet ekonomike janë të shpejta dhe kërkesat e jetës në rritje, çdo qindarkë e negociuar sot ndikon në rrogën e nesërme, në bonusin e ardhshëm dhe madje në pensionin që do marrësh dekada më vonë.
E vërteta është se shumë pak e bëjnë këtë hap dhe shpesh, janë gratë ato që ngurrojnë më shumë, jo nga mungesa e aftësisë, por nga pritshmëritë sociale dhe frika nga etiketime të padrejta. Por ky mit po bie. Statistikisht, sot afro 60% e grave në SHBA e negociojnë pagën, krahasuar me 68% të burrave, një diferencë gjithnjë e më e vogël.
Lajmi i mirë? Kur negociohet, ka rezultat. Rreth 66% e atyre që kërkuan më shumë, e morën. Dhe 28% morën fiks atë që kërkuan.
Pra, si ta bëjmë këtë bisedë siç duhet? Këtu janë 10 “lëvizje” për të negociuar pagën tënde me besim e klas:
Njih vlerën tënde para se të flasësh për para
Eksperienca, vendndodhja, aftësitë unike, janë monedha të forta në tryezën e negociatave.
Hulumto tregun
Përdor Salary.com, Glassdoor, LinkedIn, por edhe “thashethemet” nga punonjës aktualë. Informacioni është fuqi.
Zgjidh momentin e duhur
Fol pas një projekti të suksesshëm ose pas një vlerësimi pozitiv, jo gjatë pushimit të drekës.
Bëhu i qartë dhe i qetë.
Pa “më fal” ose “më duket…”, ti po ofron vlerë, jo po lyp.
Përdor një gamë page, jo një shifër fikse
“Jam duke kërkuar diçka në intervalin 1,200–1,400 euro në muaj”, tingëllon më profesional dhe fleksibël.
Fillo më lart se sa synon
Nëse dëshiron 1,000€, kërko 1,150–1,250€. Jep hapësirë për diskutim.
Lexo gjithashtu: Rrjetet sociale, trampolina drejt pasurisë/ Si po bëhen influencerët shqiptarë fytyrat e reja të suksesit?
Përgatitu për pyetje të sikletshme
Në vend që të fshihesh, ktheje fokusin tek ajo që ti do të sjellësh në kompani.
Shiko përtej rrogës
Bonuset, pushimet, puna hibride, trajnime, janë vlera të vërteta në paketë.
Merre gjithçka me shkrim
Fjalët ikin, letra qëndron. Sigurohu që marrëveshja të jetë e qartë për të dyja palët.
Trego mirënjohje, por dije kur të largohesh.
Jo çdo “jo” është fundi. Ndonjëherë, vlera jote do vlerësohet më shumë… diku tjetër.
Në fund të ditës, negociata nuk është luftë. Është art. Dhe artisti më i mirë është ai që flet me vetëbesim, përgatitje dhe respekt.
Prandaj herën tjetër që të jepet një ofertë pune, mos e prano pa folur. Mos u largoni pa pyetur. Flisni. Kërkoni. Negocioni.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
