Adoleshentët janë më të mërzitur se kurrë më parë – dhe rrjetet sociale, aplikacionet e krijuara për argëtim dhe angazhim, janë një nga fajtorët kryesorë.
Santiago Gonzalez-Winthrop, 16 vjeç, i tha Yahoo News se dikur ishte “i emocionuar” kur shkonte në shtëpi pas shkollës për të bërë detyrat. Tani, ai ndihet vazhdimisht i mërzitur, duke “parë orën të kalojë” në klasë ose duke e përjetuar me ankth ditën e detoksifikimit dixhital të familjes, ku ndjen një nevojë të madhe për celularin e tij. Ai e përdor ekranin si një “shkop mbështetës” për mërzinë, duke lëvizur pafund në Instagram, TikTok apo aplikacione të tjera për të parë se çfarë bëjnë miqtë e tij. Por kjo sjell edhe qëndrime të gjata natën para ekranit, duke ndikuar në gjumin e tij. “Nuk më kujtohet as çfarë po shoh, sinqerisht,” pranoi ai. “Sapo lë celularin, ndihem tmerrësisht keq, i turpëruar.”
Sipas të dhënave nga organizata Monitoring the Future, të cituara nga Yahoo News, mërzia është në rritje te fëmijët dhe adoleshentët. Statistikat tregojnë se 45% e maturantëve të shkollave të mesme thanë se “bien dakord” ose “pajtohen kryesisht” me deklaratën “Unë mërzitem shpesh” në vitin 2021, ndërsa 21% e nxënësve të klasave të tetë dhe dhjetë shprehën të njëjtën gjë. Krahasuar me të dhënat e vitit 2014, këto shifra janë rritur me 37% te maturantët dhe mbi 13% te nxënësit e klasave të tetë dhe dhjetë. Ndërsa këto statistika u raportuan gjatë pandemisë COVID-19, ato shënuan një tjetër rritje në vitin 2023, sipas Yahoo News.
Lexo edhe:Shkëputja nga ekranet – Sekreti për lidhje më të forta me familjen
Kent Toussaint, terapist familjar dhe themelues i Teen Therapy Center, i tha Yahoo News se mërzia e raportuar është thjesht një “mosdurim” ndaj saj. “Shumë prej kësaj vjen nga përdorimi i vazhdueshëm i ekranit dhe nga fakti që njerëzit kanë mundësinë të shmangin mërzinë përmes tij,” shpjegoi ai. “Mërzia është fara e kreativitetit, por kur njerëzit e shmangin atë gjatë gjithë kohës, ata nuk kanë nevojë të krijojnë, të mësojnë një aftësi të re, të bëjnë art apo të dalin për të bërë miq.” Për këtë arsye, ekspertët rekomandojnë që fëmijëve t’u lihet hapësirë për t’u mërzitur.
Dr. Carl Marci, psikiatër dhe autor, i tha HuffPost se pas një periudhe mërzie, fëmijët e tij fillojnë të “gjejnë mënyra krijuese për të zgjidhur problemet ose të shpërqendrohen me ndërveprime shoqërore apo lojëra,” duke u dhënë mundësinë të jenë kuriozë dhe imagjinativë. Qasja e vazhdueshme ndaj pajisjeve personale dhe ekraneve – të cilat shfaqin “përmbajtje të krijuar kryesisht për të kapur vëmendjen e një fëmije dhe për ta mbajtur atë të angazhuar sa më gjatë të jetë e mundur” – i mëson fëmijët se “ata nuk kanë nevojë të mërziten kurrë,” shtoi ai. Celularët, duket, kanë shkatërruar kureshtjen – një fenomen që shtrihet përtej mureve të shkollave të mesme. Profesori i NYU Stern School of Business, Jonathan Haidt, autor i librit The Anxious Generation, i tha Business Insider se zakonet e lëvizjes së pafundme në rrjete sociale kanë ndikuar në aftësinë e brezit të ri për të punuar. “Ata kurrë nuk kanë një moment për të reflektuar, nuk kanë kohë të mendojnë gjërat me qetësi, nuk kanë kohë të jenë kreativë,” tha ai, duke shtuar se ky brez ka ndryshuar edhe aftësitë e tij të përqendrimit. “Shkatërrimi i vëmendjes njerëzore në mbarë botën mund të jetë edhe një kosto më e madhe për njerëzimin sesa epidemia e shëndetit mendor dhe sëmundjeve mendore,” përfundoi ai.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
