Presidenti i zgjedhur Donald Trump njoftoi se investitori i njohur në teknologji, David O. Sacks, do të jetë drejtuesi i politikave për Inteligjencën Artificiale dhe kriptovalutat në Shtëpinë e Bardhë.
Në një postim në Truth Social të enjten mbrëma, Trump bëri publik këtë vendim, duke thënë:
“David do të drejtojë politikat e Administratës për Inteligjencën Artificiale dhe Kriptovalutat, dy fusha që janë kritike për të ardhmen e konkurrencës amerikane.” Trump e cilësoi këtë një detyrë shumë të rëndësishme. Ai shtoi se kjo pozitë do të fokusohet në bërjen e Shteteve të Bashkuara lidere të padiskutueshme në këto fusha, mbrojtjen e lirisë së shprehjes në internet, parandalimin e censurës dhe paragjykimeve nga kompanitë e mëdha të teknologjisë, si dhe krijimin e një kuadri ligjor për kriptovalutat.
Lexo edhe:OpenAI prezanton “12 ditët e Shipmas”: përfshin Sora dhe modelin e ri të arsyetimit
Në një postim tjetër, Trump e uroi Sacks:
“David ka njohuritë, përvojën në biznes, inteligjencën dhe pragmatizmin për ta BËRË AMERIKËN TË MADHE përsëri në këto dy fusha kritike të teknologjisë. Urime, David!”
Sipas biografisë së tij në Substack, Sacks ka qenë drejtor operativ i PayPal, përpara se të themelonte kompaninë Yammer, të cilën më pas e shiti te Microsoft për 1.2 miliardë dollarë. Trump gjithashtu theksoi sukseset profesionale të Sacks, duke shkruar në Truth Social:
“David Sacks ka qenë një sipërmarrës dhe investitor jashtëzakonisht i suksesshëm për 25 vite, duke ndërtuar dhe investuar në disa nga kompanitë më ikonike të Silicon Valley.” Interesi i Trump për kriptovalutat, veçanërisht për Bitcoin-in, është përmendur si një nga arsyet kryesore për rritjen e tregut të kriptove në javët pas fitores së tij për një mandat të dytë presidencial. Madje, Trump ka hyrë vetë në botën e valutave dixhitale, duke themeluar këtë vit kompaninë World Liberty Financial.
Të mërkurën, Bitcoin arriti për herë të parë vlerën prej 100,000 dollarësh, pasi kishte dyfishuar vlerën e tij gjatë këtij viti. Trump reagoi ndaj këtij lajmi në Truth Social të enjten, duke shkruar:
“URIME BITCOINERS!!! $100,000!!! FALË MEJE!!! Së bashku, do ta bëjmë Amerikën të Madhe Përsëri!”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
