Hoteli i parë në botë i printuar në 3D po ndërtohet në Teksas

Industria e mikpritjes dhe teknologjia e printimit 3D po bashkohen në shkretëtirën e Teksasit Perëndimor, ku po ndërtohet hoteli i parë në botë i printuar në 3D. Ky projekt ambicioz po realizohet në Marfa, një qytet i vogël në Teksas, ku hoteli ekzistues El Cosmico po zgjerohet ndjeshëm.

Me një printer 3D gjigant, i madh sa një vinç, po ndërtohen 43 njësi të reja hoteli dhe 18 shtëpi banimi mbi një sipërfaqe prej 40 hektarësh. Ky printer industrial, i quajtur Vulcan, shtreson përzierje betoni për të formuar muret e ndërtesave.

Pronarja e El Cosmico, Liz Lambert, së bashku me kompaninë ICON dhe arkitektët Bjarke Ingels Group, janë partnerët pas këtij projekti unik. Lambert shpjegoi se teknologjia e printimit 3D i jep liri të madhe krijuese dhe mundësi për të ndërtuar struktura që me metoda tradicionale do të ishin shumë të kushtueshme.

“Shumica e hoteleve janë brenda katër mureve dhe shpesh ndërtimi përsëritet vazhdimisht,” tha Lambert. “Kjo teknologji më ka dhënë mundësinë të ndërtoj me pak kufizime dhe me një lëvizshmëri të madhe – kurbat, kupolat dhe parabolat janë një mënyrë ndërtimi vërtet interesante dhe e pazakontë.”

Lexo edhe: “Meta Connect 2024”: Prezantohen “Orion”, syzet më të avancuara në botë!

Muret e njësive të para, të cilat janë rreth 12 metra të larta, përfshijnë një hapësirë banimi me tre dhoma gjumi dhe një njësi hoteli me një dhomë. Muret me forma të lakuara, të ngjyrosura në të bezhë, po krijohen nga printeri Vulcan, i cili peshon rreth 4.75 ton dhe është 46.5 metra i gjerë dhe 15.5 metra i lartë.

Materiali që përdor ky printer 3D quhet Lavacrete, një përzierje e posaçme me bazë çimentoje, e dizajnuar për forcë, kosto të përballueshme dhe printueshmëri. Jason Ballard, CEO i kompanisë ICON, shpjegoi se përbërësit e kësaj përzierjeje rregullohen në varësi të kushteve të motit, duke siguruar që ndërtimi të jetë i qëndrueshëm dhe i fortë.

Ky hotel i parë i printuar në 3D pritet të hapë horizonte të reja në industrinë e ndërtimit dhe mikpritjes, duke ofruar mundësi për ndërtimin e ndërtesave me forma komplekse dhe unike që më parë do të kishin qenë jashtëzakonisht të shtrenjta.