Në një memo të dërguar të hënën, CEO i Amazon, Andy Jassy, njoftoi punonjësit se do të duhet të kthehen në zyrë pesë ditë në javë, duke theksuar përfitimet e punës ballë për ballë. Ai përmendi se puna në zyrë ndihmon në mësim, bashkëpunim, krijimin e ideve dhe lidhjen më efektive me kolegët. Kjo politikë e re pason një njoftim të vitit të kaluar, kur Amazon kërkoi nga punonjësit të punonin tre ditë në javë në zyrë. Sipas Jassy, periudha e fundit ka forcuar bindjen e tij për përfitimet e punës në zyrë. Vendimi i Amazon për rikthimin në zyrë pesë ditë në javë, që nis nga janari, ka ngjallur debat të madh për ndikimin e punës në distancë mbi produktivitetin dhe kulturën e punës.
Amazon nuk është i vetmi që ka kërkuar kthimin e plotë në zyrë. Kompani të tjera si UPS dhe Boeing kanë marrë hapa të ngjashëm, megjithatë, shumica e kompanive teknologjike ofrojnë politika fleksibile pune.
Sidoqoftë, një studim nga Stanford University gjeti se një model hibrid, ku punonjësit punojnë dy ditë në javë nga shtëpia, nuk ndikon negativisht në performancë. Profesori Nicholas Bloom tha: “Puna hibride është fitore për produktivitetin, performancën dhe mbajtjen e punonjësve.”
Shumë punonjës të Amazon kanë spekuluar se politika për kthimin në zyrë mund të jetë një mënyrë për të zvogëluar numrin e punonjësve. Në fillim të vitit 2023, Amazon shkurtoi 27,000 vende pune, ndërsa politika për rikthimin tre ditë në javë u pasua me kundërshtime të mëdha nga disa punonjës.
Lexo edhe: Hapen konkurset për dy projektet e para të Korporatës Shqiptare të Investimeve!
Një studim i publikuar në maj gjeti se urdhrat për rikthimin në zyrë shkaktojnë largime të shumta të punonjësve, veçanërisht atyre më me përvojë. Kjo politikë e re e Amazon mund të ndikojë edhe në rekrutim dhe diversitet. Sipas profesoreshës Crystal Farh nga Universiteti i Uashingtonit, politika e re mund të largojë kandidatët potencialë që preferojnë fleksibilitetin e punës në distancë.
Megjithëse Amazon ishte një nga të parat që riktheu punonjësit në zyrë vitin e kaluar, mbetet për t’u parë nëse edhe kompani të tjera do të ndjekin shembullin e Amazon për një politikë të plotë me pesë ditë në zyrë. Shumë kompani, si Typeform, kanë vendosur të mbeten plotësisht në distancë, duke theksuar përfitimet për punonjësit dhe balancën mes punës dhe jetës.
Kjo politikë mund të ketë ndikime të mëdha për kulturën e punës së Amazon dhe aftësinë e saj për të rekrutuar dhe mbajtur talentet më të mira.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
