Dr Arun Thirunavukarasu, i cili ka studiuar në Universitetin e Kembrixhit, ka shprehur se AI mund të vendosë rastet urgjente që duhen parë nga specialistët. Akademikët e Universitetit të Kembrixhit testuan ChatGPT 4 kundrejt njohurive të mjekëve në faza të ndryshme të karrierës së tyre.
Programi i AI shënoi 69% kur u testua në një provim model prej 87 pyetjesh. Rreth 374 pyetje oftalmologjike u përdorën për të trajnuar ChatGPT 4. Përgjigjet e tij u krahasuan me pesë oftalmologë ekspertë, mjekë që kujdesen për pacientët me sëmundje të syrit, tre okulistë praktikantë dhe dy mjekë të rinj të paspecializuar. Ata u krahasuan gjithashtu me një version të mëparshëm të ChatGPT dhe modele të tjera gjuhësore.
ChatGPT 4 shënoi 69%, më shumë se programet e tjera si ChatGPT 3.5, Llama dhe Palm2. Oftalmologët ekspertë arritën një rezultat mesatar prej 76%, të trajnuarit shënuan 59% dhe mjekët e rinj shënuan 43%.
Dr Thirunavukarasu, i cili udhëhoqi studimin dhe kreu punën ndërsa studionte në Shkollën e Mjekësisë Klinike të Universitetit të Kembrixhit, tanimë punon në Fondacionin NHS të Spitaleve Universitare të Oksfordit.
Ai tha: “Ne mund të vendosim realisht AI në kontrollimin e pacientëve me probleme me sytë për të vendosur se cilat raste janë urgjente që duhet të shihen menjëherë nga një specialist, të cilat mund të shihen nga një mjek i përgjithshëm dhe cilat nuk kanë nevojë për trajtim. Modelet mund të ndjekin algoritme të qarta tashmë në përdorim, dhe ne kemi zbuluar se ChatGPT 4 është po aq i mirë sa ekspertët në përpunimin e simptomave dhe shenjave të syrit për t’iu përgjigjur pyetjeve më të ndërlikuara. Me zhvillimin e mëtejshëm, modelet e mëdha gjuhësore mund të këshillojnë gjithashtu mjekët e përgjithshëm që po përpiqen të marrin këshilla të menjëhershme nga mjekët e syrit.”
Sipas studiuesve teknologjia mund të përdoret për të klasifikuar pacientët dhe për të përcaktuar se kush ka nevojë për kujdes të specializuar dhe kush jo.
Ata shtuan se modelet gjuhësore si ChatGPT “nuk duken të afta” për të zëvendësuar mjekët e syrit, por mund të sigurojnë këshilla dhe ndihmë të dobishme për jo-specialistët. Dr. Thirunavukarasu shtoi se ai besonte se mjekët do të vazhdojnë të jenë përgjegjës për kujdesin e pacientëve.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
