Aftësimi i profesionistëve të shërbimeve socialë në punën me të rinjtë në vështirësi

Dallendyshe Xhaferri, kontributore

Ulja e lindshmërisë dhe emigrimi i popullsisë kanë ndikuar në uljen e numrit të të rinjve në vend. Papunësia e përkohshme ose afatgjatë është shoqëruar me një sërë pasojash si: rritja e dëshirës për të emigruar, rritja e kriminalitetit dhe rritja e shkallës së varfërisë. Në Shqipëri, të rinjtë e moshës 15-29 vjeç janë nxënës/studentë ose në trajnim përbëjnë 71,6% të këtij target-grupi duke qenë ekonomikisht jo-aktivë, sipas INSTAT.

Sipas vlerësimit të bërë nga Shoqata Kombëtare e Punonjësve Socialë, në Bashkitë Tiranë, Elbasan, Durrëz, Kamëz dhe Krujë rezulton se të rinjtë që janë në kontakt me ligjin, që nuk kanë kujdesin prindëror, që nuk kanë mundësi të arsimohen ose i përkasin komuniteteve të caktuara si ai rom, egjiptjan ose komunitetit LGBTQI+ përbëjnë target-grupet më të diskriminuar ose të përjashtuara nga shoqëria.

Të rinjtë në vend përballen me një sërë sfidash që i pengojnë ata të kenë akses apo të adresohen në burimet ku ata mund të marrin ndihmën e nevojshme për t’u zhvilluar. Për t’u ardhur në ndihmë këtyre kategorive të të rinjve, Shoqata Kombëtare e Punonësve Socialë, në kuadër të projektit “Qëndro” me financimin e Qeverisë Italiane dhe zbatim të UNICEF në Shqipëri, ka trajnuar prej disa muajsh profesionistët e shërbimeve sociale në të pesta bashkitë e sipërpërmenduara.

Qëllimi i vazhdueshëm i punës me profesionistët dhe ofruesit e shërbimeve sociale është që të zhvillojnë aftësi të punës dhe të angazhimit të të rinjve në vështirësi dhe t’i ndihmojnë ata të përballen me sfidat socio-ekonomike duke i referuar të rinjtë në strukturat specifike duke u dhënë mundësi për edukim dhe aftësim personal.

Profesionistët pjesëmarrës në këto aktivitete pohojnë se adresimi i këtyre sfidave kërkon një qasje gjithëpërfshirëse për fuqizimin e të rinjve që përfshin arsimin, aftësimin profesional dhe krijimin e vendeve të punës, përfshirjen sociale dhe nismat kundër diskriminimit.