Banka e Shqipërisë ka miratuar disa ndryshime të reja për kredinë konsumatore dhe atë hipotekare.
Ndryshimet e miratuara nga Këshilli Mbikqyrës i BSH, synojnë të shtojnë në rregullatore rolin e ndërmjetësuesit të kredisë dhe të parashikojnë disa dispozita në rastet kur kredia jepet nëpërmjet tyre.
Prej vitesh bankat dhe institucionet financiare jo banka kanë mundësuar financimin e blerjes së produkteve në njësitë e shitjes, nëpërmjet marrëveshjeve paraprake me shitësit. Ky kanal është i zhvilluar sidomos me bizneset e shitjes së pajisjeve elektronike dhe elektroshtëpiake.
Tanimë në rregullatoren e ndryshuar përkufizohet ndërmjetësuesi i kredisë sipas ligjit “Për mbrojtjen e konsumatorit”, që përcakton si të tillë çdo person fizik ose juridik, i cili nuk vepron si kreditor, por për qëllime që lidhen me tregtinë, biznesin ose profesionin e tij paraqet ose ofron marrëveshje kredie te konsumatorët dhe ndihmon konsumatorët në lidhje me marrëveshjet e kredisë apo lidh marrëveshje kredie me konsumatorët, në emër të kreditorit.
Lexo edhe: Interesat e kredisë në nivele të ulëta në tremujorin e tretë të vitit për SME-të
Rregullorja parashikon që tregtarët dhe mallrave dhe shërbimeve që veprojnë si ndërmjetësues të kredisë do të jenë të përjashtuar nga kërkesat e parashikuara lidhur me informacionin parakontraktor. Por, do të jetë përgjegjësi e bankës ose institucionit financiar të huadhënies që të sigurohet se konsumatori e ka marrë informacionin parakontraktor të parashikuar nga rregullorja në fjalë.
Rregullorja sjell edhe konceptin e kontratat e kredisë me afat të pacaktuar (open-end) dhe përcakton se konsumatori ka të drejtën të përfundojë në çdo kohë pa pagesë këto kontrata, përveç rastit kur palët kanë rënë dakord për një periudhë njoftimi paraprak, periudhë që në çdo rast nuk mund të jetë më shumë se një muaj. Në rast se parashikohet në kontratën e kredisë, banka mund ta përfundojë kontratën e kredisë me afat të pacaktuar, duke e njoftuar konsumatorin me shkresë ose nëpërmjet një mjeti tjetër të qëndrueshëm të komunikimit, brenda një periudhe jo më pak se dy muaj.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
