Hipertensioni, ose tensioni i lartë i gjakut, prek një të tretën e popullsisë globale. Megjithatë, shumë persona nuk janë të vetëdijshëm për këtë gjendje, pasi simptomat shpesh janë të padukshme. Në fakt, ato zakonisht shfaqen vetëm kur hipertensioni është në faza të avancuara.
Nëse nuk trajtohet, tensioni i lartë i gjakut rrit ndjeshëm rrezikun e goditjes në tru, sulmit në zemër dhe sëmundjeve kardiovaskulare.
Po cilat janë simptomat kryesore të hipertensionit?
Simptomat e hipertensionit ndryshojnë nga një person te tjetri. Disa individë mund të mos përjetojnë asnjë shqetësim, ndërsa të tjerë mund të kenë shenja të dukshme. Dr. Patrick M. Azcarate, kardiolog në Miami Cardiac and Vascular Institute, shpjegon se simptomat mund të shfaqen në çdo nivel të lartë të tensionit të gjakut, por shpesh ato bëhen të dukshme vetëm në raste të krizës hipertensive.
Kjo ndodh kur tensioni sistolik (numri i parë në një matje) shkon mbi 180 mmHg, dhe tensioni diastolik (numri i dytë) shkon mbi 120 mmHg. Për disa individë, edhe një tension 140-150 mmHg mund të jetë problematik.
Më poshtë janë 5 simptomat më të zakonshme të hipertensionit që kërkojnë vëmendje të menjëhershme mjekësore:
- Dhimbje e fortë koke
Një nga simptomat më të zakonshme të hipertensionit të rëndë është dhimbja e kokës. Një studim zbuloi se 22% e pacientëve me krizë hipertensive përjetuan dhimbje koke të forta.
Sipas Dr. Hetal Bhakta, kardiolog në Kaliforni, kjo ndodh sepse presioni i lartë në enët e gjakut në tru mund të shkaktojë tension dhe dhimbje. Nëse përjetoni dhimbje koke të vazhdueshme ose të rënda, duhet të konsultoheni menjëherë me një mjek.
- Probleme me shikimin
Hipertensioni i lartë mund të dëmtojë enët e gjakut të syrit (retinës) dhe nervin optik, duke shkaktuar shikim të turbullt ose të dëmtuar.
Dr. Bhakta shpjegon se presioni i tepërt në enët e syrit ndikon në aftësinë për të parë qartë dhe shpesh është një nga shenjat e para të tensionit të lartë të gjakut. Nëse vëreni ndryshime në shikim, është e rëndësishme të bëni një kontroll mjekësor sa më shpejt të jetë e mundur.
- Dhimbje në kraharor
Kur tensioni i gjakut është shumë i lartë, zemra mund të mos marrë sasinë e nevojshme të gjakut dhe oksigjenit, duke shkaktuar dhimbje në kraharor.
Në të njëjtin studim të përmendur më parë, 27% e pacientëve që përjetuan krizë hipertensive kishin dhimbje gjoksi. Kjo simptomë mund të jetë një shenjë paralajmëruese e sulmit në zemër, ndaj nuk duhet të neglizhohet.
- Vështirësi në frymëmarrje
Hipertensioni mund të shtojë ngarkesën e punës së zemrës, duke e bërë më të vështirë pompimin e gjakut dhe duke shkaktuar vështirësi në frymëmarrje.
Sipas Dr. John P. Higgins, kardiolog në McGovern Medical School, tensioni i lartë mund të çojë në problem të zemrës, duke krijuar grumbullim të gjakut në mushkëri, çka përkeqëson vështirësinë në frymëmarrje.
Nëse ndjeni që nuk po merrni frymë siç duhet, duhet të kërkoni ndihmë mjekësore menjëherë.
- Dëmtim i veshkave
Hipertensioni është shkaku i dytë më i zakonshëm i dështimit të veshkave në SHBA, sipas Institutit Kombëtar të Diabetit dhe Sëmundjeve të Veshkave.
Tensioni i lartë i gjakut mund të ngushtojë dhe dëmtojë enët e gjakut në veshka, duke penguar eliminimin e mbetjeve dhe lëngjeve të tepërta nga trupi. Kjo mund të përkeqësojë edhe më shumë hipertensionin, duke krijuar një cikël të rrezikshëm që mund të çojë deri në dështim të plotë të veshkave.
Kur duhet të kërkoni ndihmë mjekësore?
Hipertensioni shpesh quhet “vrasësi i heshtur”, pasi shumica e njerëzve nuk e dinë që e kanë këtë gjendje derisa t’i matet tensioni nga një mjek.
Presioni optimal i gjakut për të rriturit është më pak se 120/80 mmHg. Me kalimin e viteve, tensioni ka tendencë të rritet për shkak të ngurtësimit të enëve të gjakut, prandaj kontrollet e rregullta janë thelbësore.
Kujdesuni për shëndetin tuaj!
Hipertensioni është një sëmundje serioze, por mund të menaxhohet nëse zbulohet në kohë. Nëse përjetoni ndonjë nga simptomat e mësipërme, mos e neglizhoni, kërkoni menjëherë ndihmë mjekësore dhe matni rregullisht tensionin tuaj. Shëndeti juaj është pasuria më e madhe!
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
