Në kohët kur “mbështet bizneset lokale” është bërë moto e përhapur, është koha që edhe vetë bizneset e vogla të praktikojnë atë që predikojnë. Por çfarë ndodh kur vetë bizneset e vogla fillojnë të mbështesin njëra-tjetrën? Efekti është më i fuqishëm se ç’mund të imagjinoni!
Lexo gjithashtu: Analizë/ Startup-et në Shqipëri, një ekosistem në zgjerim me sfida dhe potencial!
Bashkëpunime që sjellin fitime të dyanshme
Një prej mënyrave më të thjeshta për të ndihmuar një biznes tjetër është përmes referimeve dhe bashkëpunimeve strategjike. Kur flet me klientët e tu, a i drejton ndonjëherë drejt një shërbimi lokal që nuk e ofron vetë?
“Gjithmonë mendoj se si mund të ndihmojmë klientët tanë dhe shpesh kjo përfshin edhe rekomandime për biznese të tjera vendase,” thotë Shilonda Downing, themeluese e Virtual Work Team. Një referim i vogël, mund të jetë një klient i madh për dikë tjetër dhe nesër mund të ndodhë e kundërta.
Mos bli nga “gjigandët”, fillo të blesh nga fqinjët
Sa shpesh blen nga kompani të mëdha për furnizime që mund t’i marrësh nga fqinjët? Craig Ross nga Infantile Industries thekson: “Në një botë digjitale, njerëzit kanë nevojë për kontakt njerëzor. Marrëdhëniet vlejnë më shumë se çmimi.” Një furnitor lokal mund të jetë më fleksibël, më i negociueshëm dhe më afër zemrës së biznesit tënd.
Bëji pjesë në marketingun tënd
Mos e mbaj vetëm për vete audiencën! Etiketo, rekomando, përmend dhe përfshi biznese të tjera në postimet e tua në rrjetet sociale, në fletushka apo në newsletter-in e kompanisë. Vasiliki Gkarmini, bashkëthemeluese e Next Door Goddess, thotë: “Në dhuratat tona, përfshijmë gjithmonë produkte nga biznese të tjera të vogla.” Suksesi yt mund të shtojë edhe suksesin e tyre dhe e anasjella.
Lexo gjithashtu: TV tradicional kundër gjigantëve të botës digjitale: Kush do të fitojë?
Rekomando si profesionist, jo si google
Kur një klient të kërkon diçka që nuk e ofron, a e dërgon te “kërkoje vetë online”? Apo i jep një emër të besuar? John Ross nga Test Prep Insight e përmbledh bukur: “Një rekomandim i sinqertë vlen më shumë se një reklamë. Ndihmon komunitetin dhe forcon besimin te marka jote.”
Pse ka rëndësi?
Statistikat e thonë troç, për çdo 1 dollar të shpenzuar në një biznes lokal, 67 cent mbeten në komunitet. Pothuajse 23 cent shkojnë drejt bizneseve të tjera lokale dhe pjesa tjetër në paga dhe benefite. Një zinxhir i vogël që bën një ndryshim të madh.
Në vend që të luftosh i vetëm, bëhu pjesë e rrjetës lokale
Përfshihu në fushata si “Bli Lokalisht”, merr pjesë në ngjarje të organizuara nga komuniteti, dhe krijo rrjete të vërteta që sjellin klientë, ide dhe bashkëpunime. Sa më shumë bizneset e vogla të bashkëpunojnë, aq më e fortë bëhet ekonomia vendase dhe aq më i qëndrueshëm bëhet edhe biznesi yt.
Pra, mos e shiko “lokalin” si një kufizim, shikoje si një mundësi për rritje të zgjuar, ndikim real dhe lidhje që zgjasin. Sepse kur rritet fqinji, rritesh edhe ti.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
