“Cilën strategji startup-i duhet të ndjek?” – Fjalia që është thënë nga çdo sipërmarrës.
Çdo sipërmarrës ka kërkuar të gjejë formulën magjike për suksesin e garantuar. Megjithatë, a ekziston vërtet një strategji universale për të ndërtuar një startup të suksesshëm?
Pavarësisht ndryshimeve mes industrive dhe tregjeve, bazat e një strategjie të suksesshme mbeten të njëjta. Joan Magretta, eksperte e strategjisë në Harvard Business School, e përmbledh kështu:
“Strategjia përbëhet nga dy pjesë kryesore: E para përfshin të gjitha aktivitetet e krijimit të një produkti ose shërbimi, dizenjimi, furnizimi me materialet e nevojshme, prodhimi etj. E dyta përfshin të gjitha aktivitetet e shitjes, gjetja e klientëve, realizimi i shitjeve, shpërndarja dhe ofrimi i shërbimeve. Një model i ri biznesi mund të jetë inovativ si në pjesën e parë ashtu edhe në të dytën.”
Lexo gjithashtu: Si një podcast i panjohur arriti të sigurojë 30,000 dollarë sponsorizime në vitin e parë?
Pra, detyra e çdo sipërmarrësi është të gjejë strategjinë që i përshtatet më mirë modelit të tij të biznesit. Megjithëse nuk ekziston një strategji universale, tre nga më të njohurat dhe të provuarat janë:
- Strategjia “rritu shpejt”
Kjo qasje, e cila lulëzoi gjatë viteve ’90, përqendrohet në rritjen agresive të një biznesi duke vendosur zgjerimin mbi fitimin. Ideja është të dominosh tregun sa më shpejt, duke krijuar një bazë të madhe klientësh dhe një markë të njohur.
Shembuj si Amazon dhe Alibaba tregojnë se kjo strategji mund të funksionojë, por gjithashtu ka raste të shumta dështimi. Për shembull, Ëebvan, një nga startup-et e para të shpërndarjes së ushqimeve në SHBA, u rrit shpejt pa një model biznesi të qëndrueshëm dhe falimentoi duke humbur 830 milionë dollarë.
- Metoda Lean Startup
E popullarizuar nga Eric Ries, kjo strategji mbështetet në tre parime kryesore, dalja sa më shpejt në treg, testimi dhe përmirësimi i vazhdueshëm, si dhe mbajtja e kostove sa më të ulëta.
Ndryshe nga strategjia “Rritu shpejt”, metoda Lean Startup synon të sigurojë fitim të qëndrueshëm që në fazat e hershme të biznesit, duhen shmangur investimet e mëdha në struktura të paqëndrueshme. Ky model është përdorur me sukses nga kompani si Dropbox dhe Airbnb.
Lexo gjithashtu: 17 vjeçari krijon krahun robotik që kontrollohet nga mendja
- Strategjia e fokusimit në klientin
Disa startup-e e ndërtojnë suksesin e tyre duke u fokusuar në mënyrë ekstreme tek nevojat dhe përvoja e klientëve. Në vend që të përpiqen të pushtojnë tregun sa më shpejt ose të minimizojnë kostot, këto kompani investojnë në krijimin e një produkti ose shërbimi që klientët e duan dhe e rekomandojnë. Një shembull i shkëlqyer është Apple, e cila nuk ishte e para në tregun e smartfonëve, por fitoi besimin e klientëve falë inovacionit dhe eksperiencës unike të përdoruesit.
Cila strategji është më e mira për startup-in tënd?
Nuk ka një përgjigje të thjeshtë. Zgjedhja varet nga natyra e biznesit, tregu dhe burimet në dispozicion. Disa kompani kanë sukses duke u rritur shpejt, të tjera duke testuar dhe përshtatur modelin e tyre hap pas hapi, ndërsa disa të tjera fitojnë duke u përqendruar në ndërtimin e një baze të fortë klientësh besnikë.
Përpara se të vendosësh për strategjinë tënde, bëj kërkim të detajuar, studio tregun dhe mos ki frikë të eksperimentosh. Sipërmarrja është një proces i vazhdueshëm mësimi, dhe strategjia më e mirë është ajo që i përshtatet më mirë vizionit tënd.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
