Intervistë me fituesin e vendit të parë të Start Up Live Tirana.
BM: Mund të na flisni pak për projektin tuaj?
Fëmijët pëlqejnë shumë të luajnë me LEGO. Gjithashtu, ata pëlqejnë edhe teknologjinë. Ideja jonë ishte që t’i bashkonim këto të dyja, LEGO-n dhe teknologjinë, dhe të krijonim një program që t’i fusnim në klasa nëpër shkolla. Kemi krijuar gjithashtu paketa të ndryshme për këtë. Tageti ynë janë fëmijët nga mosha 4-6 vjeç, dhe nga klasa e 1 deri në klasën e 9. Secila nga këto grupmosha ka një paketë të caktuar që është kurrikula, gjithashtu edhe pjesët që janë të nevojshme për vazhdimin e proçesit si formueset LEGO dhe pjesët inxhinierike softëare dhe robotë.
BM: A ka ndonjë histori pas krijimit të kësaj ideje?
Dy fëmijët e grupit kanë LEGO në shtëpi dhe pëlqejnë të luajnë shumë me to, dinë të formojnë shumë objekte, gjithashtu kanë edhe disa robotë, dhe menduam që t’i vëmë në jetë. Kështu erdhëm në idenë që të bashkojmë teknologjinë me lodrat. Makina që treguam edhe në panel që lëvizte, është një rast implementimi i asaj që krijuam dje, për 1 ditë, me pjesët e LEGO-s dhe me pjesët inxhinierike. Arritëm të formojmë një makinë, që telekomandohej me smartphone, por mund të programohet që të lëvizë edhe vetë me anë të dy sensorëve. Kjo bën që të mos përplaset me muret apo me pengesat e tjera që mund t’i dalin.
BM: A keni bërë testime të tjera?
Ky është testimi i parë që kemi bërë, sepse edhe idenë nuk kemi shumë kohë që e kemi krijuar, por kemi arritur të krijojmë kurrikulat që janë shumë të rëndësishme për formimin e klasave dhe dhënien e mësimit.
BM: A keni kontaktuar deri më tani me institucione arsimore?
Kemi dashur të shkojmë pranë Bashkisë Tiranë por ende nuk e kemi bërë. Por, kemi folur me kompani të ndryshme, madje njëra prej tyre na ka dhënë një ofertë për ta filluar si startup.
BM: A keni menduar për ndonjë strategji marketingu specifike deri më tani?
Përveç social media, do të krijojmë edhe një website, dhe më pas do të krijojmë partneritetet me kompani të tjera të cilat duan t’a zhvillojnë këtë projekt.
BM: A do të jetë kjo vetëm pjesë e shkollave, apo do të zhvillohet edhe në formën e kurseve të veçuara?
Së pari ajo do të shtrihet në shkollat private si fillim, e më pas synojmë edhe në ato publike. Por mund të jenë kurse të caktuara të cilat qëshirojnë t’a marrin këtë program nga ne.
Si shpërblim, vendi i parë mori 2 bileta për në Pioneers Festival në Vjenë si dhe host + domain falas nga webHost.al.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
