Në një vend ku statistikat e dhunës me bazë gjinore mbeten alarmante, një vajzë 16-vjeçare nga Afrika e Jugut ka dalë përpara me një zgjidhje novatore për të mbrojtur gratë dhe fëmijët. Bohlale Mphahlele, nxënëse në shkollën teknike SJ van der Merwe në provincën Limpopo, ka projektuar një pajisje sigurie diskrete dhe të veshshme, e cila mund të shpëtojë jetë.
Shpikja e saj, e quajtur Alerting Earpiece, duket si një vath i thjeshtë, por brenda tij fshihet teknologji e avancuar që synon të luftojë dhunën me bazë gjinore dhe trafikimin e qenieve njerëzore, dy probleme serioze në Afrikën e Jugut, një nga vendet me normat më të larta të dhunës ndaj grave në botë.
Sipas të dhënave të Policisë së Afrikës së Jugut (SAPS), mbi 120 mijë raste të krimeve të dhunshme ndaj grave dhe fëmijëve janë raportuar brenda një viti të vetëm. Fatkeqësisht, shumë raste të tjera mbeten të paraportuara për shkak të frikës dhe stigmatizimit. Ky realitet tronditës e shtyu Bohlale Mphahlele-n të veprojë. Ajo identifikoi nevojën urgjente për mjete praktike dhe të aksesueshme që fuqizojnë individët e cenueshëm dhe ofrojnë mbrojtje në kohë reale.
Si funksionon “Alerting Earpiece”?
Pajisja funksionon në mënyrë të thjeshtë dhe diskrete. Me shtypjen e një butoni të fshehur, ajo:
- Regjistron në heshtje imazhe të sulmuesit, përmes një kamere të kamufluar.
- Dërgon menjëherë sinjale emergjence, së bashku me vendndodhjen GPS në kohë reale, tek kontaktet e besuara dhe shërbimet emergjente.
Kjo teknologji jo vetëm që përshpejton reagimin e autoriteteve, por edhe siguron prova kyçe për ndjekje ligjore, një element shpesh i munguar në rastet e dhunës me bazë gjinore.
Inovacioni i saj i solli Bohlale Mphahlele-s medaljen e bronztë në kategorinë inxhinieri-elektronikë në Eskom Expo for Young Scientists, një platformë prestigjioze për promovimin e ideve shkencore të të rinjve. Juristët vlerësuan faktin që ajo trajtoi një nga problemet më të mprehta shoqërore të Afrikës së Jugut me një dizajn elegant dhe funksional.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
