Kur Meta publikoi parashikimet për shpenzimet kapitale vitin e kaluar, kompania e bëri të qartë se ishte gati të investonte fuqishëm për të zgjeruar kapacitetet e saj në fushën e inteligjencës artificiale (AI). “Ne presim që zhvillimi i një infrastrukture udhëheqëse për AI të jetë një avantazh kyç për krijimin e modeleve më të mira dhe përvojave më të avancuara për përdoruesit,” deklaroi Susan Li, drejtoresha financiare e Meta-s, gjatë një konference mbi rezultatet financiare verën e kaluar.
Tashmë, duket se gjiganti teknologjik po e vë në praktikë këtë strategji. Të hënën, CEO i Meta-s, Mark Zuckerberg, njoftoi lançimin e Meta Compute, një iniciativë e re që synon forcimin dhe zgjerimin e ndjeshëm të infrastrukturës së kompanisë për AI. Sipas Zuckerberg, Meta planifikon të rrisë ndjeshëm konsumin dhe kapacitetin energjetik në vitet në vijim.
“Meta po planifikon të ndërtojë dhjetëra gigavat kapacitet energjetik gjatë kësaj dekade, dhe qindra gigavat apo më shumë në afatgjatë. Mënyra se si ne projektojmë, investojmë dhe bashkëpunojmë për ndërtimin e kësaj infrastrukture do të kthehet në një avantazh strategjik,” shkroi Zuckerberg në një postim në platformën Threads.
Lexo edhe: 7 robotë humanoidë që po ripërcaktojnë mënyrën se si punojmë dhe jetojmë
Për kontekst, një gigavat është një njësi matëse e fuqisë elektrike e barabartë me një miliard vat. Zgjerimi i shpejtë i industrisë së AI-së, e njohur për konsumin e lartë të energjisë, pritet të rrisë ndjeshëm kërkesën për energji elektrike në SHBA gjatë dekadës së ardhshme — nga rreth 5 gigavat aktualisht në deri në 50 gigavat, sipas disa vlerësimeve.
Zuckerberg ka emëruar tre drejtues që do të udhëheqin këtë projekt strategjik. Njëri prej tyre është Santosh Janardhan, drejtuesi global i infrastrukturës në Meta, i cili është pjesë e kompanisë që nga viti 2009. Ai do të drejtojë punën mbi arkitekturën teknike, software-in, programet e silikonit, produktivitetin e zhvilluesve, si dhe ndërtimin dhe operimin e rrjetit global të qendrave të të dhënave (data centers) të Meta-s.
Në projekt është përfshirë edhe Daniel Gross, i cili iu bashkua Meta-s vetëm vitin e kaluar. Gross është bashkëthemelues i Safe Superintelligence, së bashku me ish-kryeshkencëtarin e OpenAI, Ilya Sutskever. Sipas Zuckerberg, Gross do të drejtojë një grup të ri brenda Meta-s, përgjegjës për strategjinë afatgjatë të kapaciteteve, partneritetet me furnitorë, analizën e industrisë, planifikimin dhe modelimin e biznesit.
Figura e tretë kyçe është Dina Powell McCormick, ish-zyrtare qeveritare, e cila së fundmi është emëruar presidente dhe zëvendëskryetare e Meta-s. Ajo do të ketë për detyrë bashkëpunimin me qeveritë për të ndihmuar në “ndërtimin, vendosjen, investimin dhe financimin e infrastrukturës së Meta-s”.
Njoftimi vjen në një kohë kur gara për ndërtimin e mjediseve cloud të gatshme për AI gjenerative po intensifikohet ndjeshëm. Parashikimet për shpenzimet kapitale të shpallura vitin e kaluar tregojnë se edhe konkurrentët kryesorë të Meta-s kanë ambicie të ngjashme. Microsoft ka zgjeruar partneritetet me ofrues të infrastrukturës për AI, ndërsa në dhjetor, kompania mëmë e Google, Alphabet, njoftoi blerjen e firmës së qendrave të të dhënave Intersect.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
