Zëri i Melanias nuk është i saji, mirësevini në epokën e botimit me inteligjencë artificiale

Melania Trump, Zonja e Parë e SHBA-ve, ka publikuar versionin audio të kujtimeve të saj, por pa shqiptuar asnjë fjalë vetë. Zëri që dëgjohet përgjatë librit është një krijim i inteligjencës artificiale, një kopje digjitale e zërit të saj, e prodhuar nga kompania ElevenLabs.

“Kam nderin t’ju prezantoj ‘Melania – The AI Audiobook’, plotësisht nga inteligjenca artificiale me zërin tim,” shkroi ajo në platformën X. “Le të nisë e ardhmja e botimit.”

Ky moment është më shumë se një veçanti teknologjike. Është një sinjal i fortë për transformimin e industrisë së medias dhe botimit, që tashmë po lëviz me hapa të shpejtë drejt automatizimit përmes AI-së. Dhe, për shumë profesionistë të industrisë kreative, ky është edhe një sinjal alarmi.

Lexo gjithashtu: Nga fatura e lartë, tek autonomia energjetike, Anduel Çekrezi shpjegon pse po rritet interesimi për panelet diellore

Nga librat tek filmat, AI po hyn në çdo faqe dhe ekran

Teknologjia që qëndron pas këtij audiolibri nuk është e re, por përdorimi i saj nga një figurë kaq publike e bën lajmin të bujshëm. Platforma si ElevenLabs dhe Google tashmë ofrojnë mjete të thjeshta për të kthyer tekstin në zë, duke krijuar përmbajtje që duken si të prodhuara nga njerëzit, por në fakt janë 100% artificiale.

Në të njëjtën javë që Melania publikoi librin e saj me zë të krijuar nga AI, Google prezantoi një version të avancuar të teknologjisë së saj për krijimin e videove dhe audios, që gjeneron dialog automatikisht në bazë të skenës. Ndërkohë, OpenAI mbushi titujt në fund të vitit të kaluar me “Sora”, një mjet që krijon video gjenerative dhe që u bë kaq i kërkuar, sa kompania u detyrua të ndalojë përkohësisht regjistrimet.

Edhe pse ende nuk flasim për filma të gjatë plotësisht të krijuar nga AI, përmbajtjet e shkurtra në rrjete sociale dhe përdorimi i AI-së në emisionet televizive po rritet me shpejtësi. Sipas ekspertëve, prodhuesit tashmë po eksperimentojnë me “versione virtuale” të prezantuesve televizivë, që mund të komunikojnë në kohë reale me audiencën.

A po rrezikohen vendet e punës në media?

Zhvillimi i shpejtë i AI-së ka nxitur shqetësime për të ardhmen e vendeve të punës në sektorin mediatik. Një raport i Forumit Ekonomik Botëror tregoi se 41% e punëdhënësve planifikojnë të shkurtojnë staf për shkak të përfshirjes së AI-së në detyra të zakonshme pune.

Në vitin 2023, greva 146-ditore e skenaristëve të Hollivudit synonte pikërisht këtë, mbrojtjen nga zëvendësimi nga AI. Marrëveshja përfundimtare ndaloi përdorimin e AI-së për të shkruar ose rishkruar materiale letrare.

Por jo të gjitha profesionet janë njësoj të prekshme. “Nëse je gazetar investigativ dhe ke nevojë të kuptosh situata komplekse dhe të krijosh marrëdhënie njerëzore, kjo nuk zëvendësohet lehtë,” thotë Clay Shirky, nënrektor për AI në Universitetin e Nju Jorkut.

Ekspertët parashikojnë që organizatat do të përqafojnë më shumë profile hibride, njerëz që njohin artin dhe teknologjinë. Në vend të tre personave me diploma në komunikim, një ekip zhvillimi mund të përfshijë një artist, një programues dhe një analist të të dhënave.

Po nëse mund të flisni me Melanian?

E ardhmja që dikur na dukej skenar filmi, sot është vetëm disa klikime larg. Ekspertët parashikojnë që botimet digjitale do të bëhen gjithnjë e më interaktive. “Po sikur të mund të bisedoni me Melanian për kapitullin që sapo lexuat?” pyet Oren Etzioni, profesor në Universitetin e Uashingtonit. “Ndoshta jo ende me të, por kjo po vjen.”

Ky audiolibër nuk është vetëm një hap drejt modernizimit të botimeve, është një paralajmërim. Inteligjenca artificiale po ndryshon jo vetëm mënyrën si konsumojmë përmbajtjen, por edhe mënyrën si ajo krijohet. Dhe për botuesit, gazetarët dhe krijuesit e përmbajtjes në mbarë botën, pyetja nuk është më “A do të ndikojë AI?”, por “Si do të mbijetojmë dhe përshtatemi në një botë të dominuar prej saj?”

CNN