Microsoft njoftoi të enjten se do të vazhdojë të ofrojë teknologjinë e inteligjencës artificiale të startup-it Anthropic në produktet e saj për klientët, me përjashtim të përdorimit nga Pentagon.
Vendimi vjen pasi agjencia federale amerikane informoi Anthropic se kompania do të klasifikohej si një rrezik për zinxhirin e furnizimit (supply-chain risk). Në reagimin e saj, Anthropic deklaroi se planifikon ta sfidojë këtë vendim në gjykatë.
Vetëm pak ditë më parë, Donald Trump u kishte bërë thirrje agjencive federale të ndalonin përdorimin e teknologjive të Anthropic. Ndërkohë, Sekretari amerikan i Mbrojtjes, Pete Hegseth, tha se kompania do të vazhdojë të ofrojë shërbimet e saj për Pentagonin për një periudhë jo më të gjatë se gjashtë muaj. Sipas raportimeve të CNBC, modelet e inteligjencës artificiale të Anthropic janë përdorur edhe në operacionet ajrore të fundit të SHBA-së në Iran.
Bisedimet mes Departamentit amerikan të Mbrojtjes dhe Anthropic u ndërprenë pasi palët nuk arritën marrëveshje lidhur me përdorimin e AI për mbikëqyrje masive brenda vendit dhe për zhvillimin e armëve plotësisht autonome. Pas kësaj, rivali i Anthropic, OpenAI, njoftoi se Pentagoni kishte pranuar të përdorte modelet e tij për ngarkesa pune të klasifikuara.
Microsoft është kompania e parë e madhe teknologjike që konfirmon publikisht se do të vazhdojë bashkëpunimin me Anthropic pas këtij vendimi të Pentagonit. Disa kompani të teknologjisë së mbrojtjes ndërkohë u kanë kërkuar punonjësve të tyre të ndalojnë përdorimin e modeleve Claude të Anthropic dhe të kalojnë në alternativa të tjera.
“Në bazë të analizës së bërë nga juristët tanë, kemi arritur në përfundimin se produktet e Anthropic, përfshirë Claude, mund të vazhdojnë të jenë të disponueshme për klientët tanë, përveç Departamentit të Mbrojtjes, përmes platformave si Microsoft 365, GitHub dhe Microsoft AI Foundry. Gjithashtu mund të vazhdojmë bashkëpunimin me Anthropic në projekte që nuk lidhen me mbrojtjen,” tha një zëdhënës i Microsoft për CNBC.
Microsoft furnizon me teknologji një gamë të gjerë agjencish qeveritare në SHBA. Platforma Microsoft 365 përdoret gjerësisht edhe brenda Pentagonit. Në shtator, kompania njoftoi integrimin e modeleve të inteligjencës artificiale të Anthropic në shtesën Microsoft 365 Copilot, krahas modeleve të OpenAI.
Modelet Claude të Anthropic janë bërë gjithashtu shumë të përdorura nga programuesit për shkrimin dhe përpunimin e kodit. Ato janë të disponueshme në shërbimin GitHub Copilot, krahas modeleve konkurrente Codex të OpenAI. CEO i Microsoft, Satya Nadella, fillimisht u fokusua në një partneritet të ngushtë me OpenAI, por në periudhën e fundit ai ka zgjeruar strategjinë duke integruar edhe modele të zhvilluesve të tjerë në produktet e kompanisë.
“Model choice!” shkroi Nadella në një postim në rrjetin social X në tetor, duke demonstruar mundësinë për të kaluar mes modeleve të Anthropic dhe OpenAI brenda Microsoft 365 Copilot.
Në nëntor, Microsoft njoftoi se Anthropic kishte marrë angazhimin për të shpenzuar 30 miliardë dollarë në shërbimet cloud Azure të Microsoft, ndërsa Microsoft planifikonte të investonte deri në 5 miliardë dollarë në Anthropic. Shifrat janë edhe më të mëdha në partneritetin me OpenAI: deri në tetor, Microsoft kishte një pjesëmarrje prej 135 miliardë dollarësh në strukturën e saj të re si korporatë me përfitim publik, ndërsa OpenAI ishte angazhuar të shpenzonte 250 miliardë dollarë në Azure.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
