Një softuer me inteligjencë artificiale është vënë në përdorim nga një strukturë spitalore e NHS në West Yorkshire të Mbretërisë së Bashkuar, me qëllim përshpejtimin e diagnozës për sëmundje si kanceri në mushkëri dhe infeksionet respiratore.
Teknologjia e re, e cila ndihmon në interpretimin e radiografive të kraharorit, synon të mundësojë trajtim më të shpejtë për pacientët dhe të luajë një rol kyç në sigurinë e tyre, sipas Leeds Teaching Hospitals NHS Trust. Sipas një zëdhënësi të spitalit, AI-ja funksionon si një “bashkëpilot” për mjekët dhe është në gjendje të identifikojë deri në 85 probleme të ndryshme brenda pak minutash.
Dr. Fahmid Chowdhury, drejtuesi klinik i projektit dhe radiolog konsultant, shpjegoi se përfitimet reale do të vërehen me kalimin e kohës, sidomos kur AI të fillojë të sinjalizojë automatikisht radiografitë me anomali. “Radiografitë që përmbajnë anomali do të raportohen më shpejt,” – theksoi ai. “Kjo do të sjellë përfitime jo vetëm për ata që kanë nevojë për trajtim, por edhe për pacientët që nuk kanë probleme, duke u ofruar atyre dhe stafit mjekësor një ndjenjë sigurie.”
Lexo edhe:Aftësitë digjitale, pika e dobët e të rinjve shqiptarë – sinjal alarmi nga Eurostat
Sipas të dhënave të institucionit, çdo vit realizohen më shumë se 135,000 radiografi të kraharorit. Ky projekt është pjesë e Yorkshire Imaging Collaborative – një rrjet rajonal i imazherisë mjekësore – dhe mbështetet nga fondi britanik për diagnostikimin me AI, i cili ka akorduar 21 milionë paund për 11 rrjete imazherike në të gjithë vendin. Sipas Dr. Chowdhury, programi pilot i nisur muajin e kaluar në Leeds ka treguar tashmë efikasitetin e tij. “Kam parë vetë një rast ku, në pamje të parë, anomalia nuk ishte e dukshme, por AI e evidentoi menjëherë,” – tregoi ai.
Megjithatë, Dr. Chowdhury theksoi se inteligjenca artificiale nuk do të zëvendësojë mjekët, por do të punojë krah tyre. “Vendimi përfundimtar mbetet gjithmonë në duart e mjekut apo profesionistit të kujdesit shëndetësor,” – sqaroi ai. “AI është bashkëpiloti, jo piloti – nuk është ai që e fluturon avionin. Është mjeku që e bën këtë, ndërsa AI thjesht e mbështet gjatë rrugës.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
