Presidenti i Shteteve të Bashkuara, Donald Trump, ka njoftuar vendosjen e një sërë tarifash të reja doganore, duke përfshirë edhe një tarifë prej 10% për Shqipërinë dhe Kosovën. Ky vendim është pjesë e një politike të gjerë tregtare, e cila synon të rishikojë balancat ekonomike mes SHBA-së dhe partnerëve të saj ndërkombëtarë.
Lexo gjithashtu: “Dita e Çlirimit” për Trump dhe amerikanët, a është ky fundi i epokës së lirë tregtare?
Në një fjalim të mbajtur të mërkurën, Trump e quajti këtë veprim si “dita e çlirimit”, duke argumentuar se ekonomia amerikane është dëmtuar për dekada nga praktikat tregtare të padrejta. Ai prezantoi një grafik ku përfshiheshin vendet që do të preken nga këto tarifa, me Bashkimin Evropian që do të përballet me një tarifë prej 20%, Vietnamin me 46%, Tajvanin me 32%, Japoninë me 24% dhe Korenë e Jugut me 25%, ndër të tjera.
Një nga elementët kryesorë të strategjisë së Trump është vendosja e një tarife 25% për të gjitha automjetet e prodhuara jashtë SHBA-së. Sipas tij, industria amerikane e makinave është dëmtuar rëndë nga disbalancat tregtare, ku makinat e prodhuara në SHBA kanë një përfaqësim të ulët në tregjet aziatike, ndërsa markat aziatike dominojnë tregun amerikan.
Shqipëria dhe Kosova në listë, çfarë do të thotë kjo?
Ndërsa detajet mbi ndikimin konkret të tarifës 10% për Shqipërinë dhe Kosovën mbeten ende të paqarta, përfshirja e dy vendeve ballkanike në këtë paketë tarifore ngre pikëpyetje mbi raportet tregtare me SHBA-në. Deri më tani, tregtia mes vendeve ka qenë e kufizuar, por ky hap sinjalizon një qasje të re ndaj politikave ekonomike amerikane edhe në raport me Ballkanin.
Lexo gjithashtu: A do të ndezë fitorja e Trump një luftë tregtare globale?
Trump njoftoi gjithashtu se do të firmosë një urdhër ekzekutiv për vendosjen e “tarifave reciproke”, duke kërkuar që vendet e tjera të eliminojnë barrierat dhe të rrisin blerjet e produkteve amerikane nëse duan të shmangin tarifat.
Kjo qasje pritet të shkaktojë reagime në arenën ndërkombëtare, veçanërisht nga Bashkimi Evropian dhe vendet aziatike që tashmë janë ndër objektivat kryesorë të politikave tarifore të Trump. Mbetet për t’u parë nëse dhe si do të reagojnë Shqipëria dhe Kosova ndaj këtij zhvillimi dhe çfarë ndikimi mund të ketë kjo në marrëdhëniet ekonomike me SHBA-në.
Artikull ekskluziv i Business Magazine Albania.
Ky artikull gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Business Magazine Albania” shoqëruar me linkun e artikullit origjinal
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
