Apple është gjobitur me 500 milionë euro dhe Meta me 200 milionë euro, pasi rregullatorët evropianë të konkurrencës aplikuan për herë të parë sanksione në kuadër të ligjit të ri të rëndësishëm që synon të kufizojë fuqinë e gjigantëve të teknologjisë. Sanksionet pasuan një hetim njëvjeçar nga Komisioni Evropian, ekzekutivi i BE-së, për të parë nëse këto kompani përputhen me Aktin për Tregjet Digjitale (DMA), i cili synon t’u japë më shumë hapësirë konkurrencës dhe bizneseve më të vogla në tregjet e dominuara nga gjigantët e teknologjisë.
Apple ka deklaruar se do ta kundërshtojë gjobën e BE-së.
“Njoftimet e sotme janë një shembull tjetër i Komisionit Evropian që e shënjestron padrejtësisht Apple me një sërë vendimesh që janë të dëmshme për privatësinë dhe sigurinë e përdoruesve tanë, të dëmshme për produktet, dhe që na detyrojnë të japim teknologjinë tonë falas,” – tha Apple në një deklaratë të dërguar me email.
Meta gjithashtu kritikoi vendimin e BE-së.
“Komisioni Evropian po përpiqet të dëmtojë qëllimisht bizneset e suksesshme amerikane, ndërkohë që lejon kompanitë kineze dhe evropiane të funksionojnë sipas standardeve të ndryshme,” – thuhej në një deklaratë të Metës. “Kjo nuk ka të bëjë vetëm me një gjobë; Komisioni po na detyron të ndryshojmë modelin tonë të biznesit, duke na imponuar në mënyrë efektive një tarifë prej miliarda dollarësh dhe duke na detyruar të ofrojmë një shërbim më të dobët.”
Sipas rregullatorëve evropianë, Apple duhet të heqë kufizimet teknike dhe tregtare që i pengojnë zhvilluesit e aplikacioneve të orientojnë përdoruesit drejt ofertave më të lira jashtë App Store.
Komisioni tha gjithashtu se modeli “ose paguaj ose prano gjurmimin” që Meta prezantoi në nëntor 2023 shkel DMA-n. Ky model u ofron përdoruesve të Facebook dhe Instagram një shërbim falas nëse pranojnë të gjurmohen për reklama, ose ndryshe, mund të paguajnë për një version pa reklama.
Lexo edhe: Hollywood në epokën e robotëve, edhe filmat me AI mund të fitojnë Oscar!
Meta është ende në bisedime me BE-në për një version të ri të këtij modeli. Kompanitë kanë dy muaj afat për të zbatuar urdhrat, përndryshe rrezikojnë gjoba të tjera.
Apple shmangu një gjobë në një hetim të veçantë që kishte të bënte me opsionet e shfletuesve në iPhone, pasi bëri ndryshime që e bëjnë më të lehtë kalimin te një shfletues ose motor kërkimi rival. Rregullatorët thanë se këto ndryshime përputhen me DMA-n dhe mbyllën hetimin të mërkurën.
Megjithatë, Apple u akuzua përsëri për shkelje të rregullave të DMA-s, pasi u tha se pengon përdoruesit të shkarkojnë dyqane alternative aplikacionesh apo aplikacione direkt nga uebi – një praktikë e njohur si “sideloading”.
Rregullatorët kritikuan kushtet e Apple, duke thënë se ato dekurajojnë zhvilluesit që të përdorin kanale të tjera shpërndarjeje aplikacionesh në iOS dhe i detyrojnë ata të pranojnë kushte biznesi që përfshijnë një tarifë të re të quajtur “Apple Core Technology Fee”.
Ndërkohë, Komisioni Evropian hoqi klasifikimin e Meta Marketplace si “portier” sipas DMA-së, pasi numri i përdoruesve ra nën pragun e përcaktuar.
“Ne kemi ndërmarrë masa të forta, por të balancuara ndaj të dy kompanive, të bazuara në rregulla të qarta dhe të parashikueshme,” – deklaroi Komisioni Evropian.
Këto gjoba mund të nxisin tensione me Presidentin amerikan Donald Trump, i cili ka kërcënuar se do të vendosë tarifa ndaj vendeve që penalizojnë kompanitë amerikane.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
