Restoranti “Georges Blanc” në Francë, i njohur si vendi me karrierën më të gjatë në botë me yje Michelin, ka humbur një nga tre yjet e tij të famshëm, të cilët i mbante që nga viti 1981. Një ngjarje që ka tronditur jo vetëm kuzhinën franceze, por të gjithë botën e kulinarisë elitare.
Restoranti ndodhet në komunën e vogël Vonnas, në lindje të Francës, dhe është pjesë e historisë që nga viti 1872, kur u themelua me emrin “La Mère Blanc”. Ishte gjyshja e Georges Blanc, Élisa, që fitoi yllin e parë Michelin në vitin 1929, vetëm tre vite pasi u shpikën vetë yjet nga guida Michelin.
Lexo gjithashtu: Ushqimet e përditshme që ndihmojnë shëndetin mendor
Tre breza grash qëndruan pas sobave para se Georges Blanc të merrte drejtimin në vitin 1968, vetëm 25 vjeç. Ai arriti ta çonte restorantin në majë, duke fituar yllin e tretë, dhe duke e mbajtur atë për më shumë se 40 vite.
Por tashmë, sipas Michelin, koha ka sjellë një ndryshim jo dhe aq të këndshëm.
“Kriteret tona janë të pandryshuara prej 125 vitesh,” tha një zëdhënëse e Michelin. “Gjithçka varet nga pjata, cilësia e përbërësve, teknika e gatimit, harmonia e shijeve, personaliteti i kuzhinierit dhe konsistenca mes vizitave të ndryshme.”
Inspektorët anonimë të Michelin e vizitojnë restorantin disa herë në vit dhe marrin vendimin kolegjialisht, jo individualisht.
Reagimi i Georges Blanc, tashmë 82 vjeç, ishte stoik:
“Nuk e prisnim. Do na mungojë një yll, por do të menaxhojmë me dy. Nuk është fundi i botës.”
Lexo gjithashtu: Ushqimet e përpunuara mund të përshpejtojnë plakjen biologjike, sipas studimit
Restoranti hapet vetëm për 1 orë e 15 minuta për darkë të enjten dhe për drekë e darkë nga e premtja deri të dielën. Menutë janë të porositura paraprakisht dhe përfshijnë pjatanca kreative me pulë Bresse, karkaleca deti dhe krepa tradicionale lokale, të shoqëruara me verë nga një bodrum me 140 mijë shishe.
Kjo nuk është hera e parë që guida Michelin përballet me debate. Shefa të njohur si Marc Veyrat dhe Eo Yun-gëon kanë kundërshtuar publikisht vlerësimet, disa duke kërkuar të mos përfshihen fare në guidë.
Ceremonia zyrtare për ndarjen e yjeve në Francë do të mbahet më 31 mars, por humbja e Georges Blanc është një sinjal se edhe legjendat nuk janë të paprekshme.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
Albanian
English