Më 11 dhe 12 shkurt 2026, Tirana do të mirëpresë Edicionin e 4-t të Tourism Fair Albania (TFA26), panairin më të madh të dedikuar sektorit të turizmit në Shqipëri. Eventi do të zhvillohet në Pallatin e Kongreseve dhe është i hapur për publikun e gjerë, duke ruajtur njëkohësisht një fokus të qartë B2B, të orientuar drejt bashkëpunimeve profesionale dhe takimeve mes aktorëve të industrisë së turizmit ndërkombëtar.
Panairi do të hapet zyrtarisht me Ceremoninë e Hapjes më 11 shkurt, në orën 10:00, në hollin kryesor të Pallatit të Kongreseve, me pjesëmarrjen e Blendi Gonxhja, Ministër i Turizmit, Kulturës dhe Sportit, si dhe përfaqësuesve institucionalë, partnerëve dhe profesionistëve të sektorit.
Tourism Fair Albania është konsoliduar ndër vite si një platformë strategjike e industrisë së turizmit, duke bashkuar operatorë turistikë, destinacione, struktura akomoduese, DMC, kompani të sektorit HoReCa, teknologji për sektorin e mikpritjes, institucione publike dhe blerës profesionistë ndërkombëtarë, me fokus në bashkëpunime konkrete dhe zhvillim të qëndrueshëm.
Një platformë me impakt ndërkombëtar
TFA26 do të sjellë në Tiranë 40 blerës ndërkombëtarë nga mbi 18 vende të botës, përfshirë tregje me potencial të lartë si SHBA, Kanada, Japoni, Kinë dhe Tajlandë, si dhe tregje kyçe europiane si Anglia, Gjermania, Irlanda dhe Franca. Përmes kësaj platforme, panairi synon të forcojë pozicionimin ndërkombëtar të Shqipërisë si destinacion turistik gjithëvjetor, duke nxitur flukse të reja turistësh dhe marrëveshje konkrete biznesi për sezonet në vijim.
Program profesional dhe diskutime strategjike
Gjatë dy ditëve, Tourism Fair Albania 2026 do të ofrojë një program të pasur profesional, me mbi 15 panele diskutimi mbi tematika aktuale dhe strategjike të sektorit të turizmit, si: promovimi dhe pozicionimi i destinacioneve në tregun global, teknologjia në sektorin e mikpritjes, punësimi, bashkëpunimi ndërrajonal, standardet dhe cilësia e shërbimit, digjitalizimi i proceseve dhe pagesave, si dhe inteligjenca artificiale në turizëm.
Panelet do të sjellin jo vetëm analiza dhe perspektiva profesionale, por edhe përvoja konkrete nga ekspertë të njohur të sektorit, si dhe nga profesionistë të terrenit që kontribuojnë çdo ditë në zhvillimin e industrisë së turizmit.
Hapësirë edhe për publikun e gjerë
Përveç dimensionit profesional, panairi mbetet i hapur edhe për publikun e gjerë, duke ofruar një përvojë dinamike dhe gjithëpërfshirëse. Vizitorët do të kenë mundësinë të njihen nga afër me kulturën, traditat dhe ofertën turistike të Shqipërisë dhe rajonit, përmes prezantimeve, performancave artistike dhe aktiviteteve që e kthejnë panairin në një event të gjallë dhe të aksesueshëm për të gjithë.
Ftesë për median
Media vendase dhe rajonale janë të ftuara të marrin pjesë dhe të mbulojnë nga afër Ceremoninë e Hapjes, eventet B2B, panelet profesionale dhe dinamikën e panairit përgjatë dy ditëve.
Për më shumë informacion:
Tourism Fair Albania 2026
Data: 11–12 shkurt 2026
Vendndodhja: Pallati i Kongreseve, Tiranë
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
