Samsung Electronics ka siguruar një kontratë të re prej 16.5 miliardë dollarësh për të prodhuar çipa inteligjence artificiale për kompaninë Tesla, në një marrëveshje që konsiderohet si fitore e rëndësishme për divizionin e saj të gjysmëpërçuesve, i cili prej kohësh ka hasur vështirësi në treg.
Marrëveshja, që do të zgjasë deri në fund të vitit 2033, parashikon prodhimin e çipave të gjeneratës së re të quajtur “AI6” në një fabrikë të re në ndërtim në Taylor, Texas. Lajmi u konfirmua nga drejtuesi i Tesla-s, Elon Musk, në rrjetin X, duke përforcuar raportimet e Bloomberg.
Lexo edhe:SHBA dhe BE bien dakord për një marrëveshje tregtare me tarifë doganore prej 15%
Aksionet e Samsung në bursën e Seulit u rritën me 6.8%, duke shënuar nivelin më të lartë që nga shtatori, ndërsa furnitorët si Soulbrain Co. regjistruan rritje deri në 16%. Zëdhënës të Samsung nuk dhanë komente shtesë, duke përmendur detyrimet për konfidencialitet në kontratë. “Elon Musk e cilësoi këtë marrëveshje si strategjike dhe me rëndësi të jashtëzakonshme,” duke shtuar se vlera e përmendur është vetëm një minimum dhe se “prodhimi real pritet të jetë disa herë më i lartë.” Musk njoftoi gjithashtu se do të jetë personalisht i përfshirë në procesin e optimizimit të prodhimit të çipave në fabrikë. Komponenti AI6 do të jetë thelbësor për sistemin e drejtimit autonom të makinave Tesla në vitet e ardhshme, ndërsa aktualisht Samsung prodhon çipin AI4 për kompaninë.
Një ringjallje për divizionin e gjysmëpërçuesve të Samsung?
Kontrata vjen në një moment kur Samsung ka hasur vështirësi në mbushjen e kapaciteteve të saj të fabrikimit dhe është përballur me konkurrencë të fortë nga gjiganti tajvanez TSMC. Sipas të dhënave të TrendForce, në tremujorin e parë të këtij viti, TSMC zotëronte 67.6% të tregut global të prodhimit të çipave për palë të treta, ndërsa pjesa e Samsung ra në 7.7%, nga 8.1% në tremujorin e kaluar. Kjo kontratë vlerësohet si një moment i rëndësishëm kthese për Samsung, sidomos pasi kryetari ekzekutiv Jay Y. Lee u lirua nga të gjitha akuzat ligjore, duke i hapur rrugën kompanisë për të avancuar në projekte të mëdha ndërkombëtare.
Sipas analistit të NH Investment & Securities, Ryu Young-ho, marrëveshja mund të ketë një peshë modeste në të ardhurat vjetore të fabrikës, por vlera e saj reale qëndron në ndikimin afatgjatë që ka mbi avancimin teknologjik dhe reputacionin e kompanisë si alternativa më e fortë ndaj TSMC, veçanërisht në një kohë kur Intel po përballet me skepticizëm nga investitorët mbi strategjinë e saj të ardhshme. Samsung dhe TSMC po garojnë aktualisht për të sjellë në treg çipin e gjeneratës së ardhshme me teknologjinë 2-nanometër, dhe kjo marrëveshje shihet si sinjal besimi për kapacitetet e ardhshme të prodhimit të Samsung në këtë drejtim. Sipas Bloomberg Intelligence, kontrata me Tesla pritet të rrisë shitjet vjetore të divizionit të fabrikimit të çipave të Samsung me rreth 10% gjatë periudhës 2025–2033, duke ndikuar në rimëkëmbjen e sektorit dhe rritjen e konkurrueshmërisë globale të gjigantit korean.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
