Të rinjtë shqiptarë, të kualifikuar për pozicione pune

Kushtet e punës, niveli i pagave, por dhe ideja e një të ardhmeje të sigurt bëjnë që të rinjtë shqiptar të kërkojnë mundësi punësimi jashtë vendit. Nga ana tjetër krahu i lirë i punës e bën Shqipërinë një vend tërheqës për investitorët e huaj.

Ditën e enjte në Tiranë, Europe Agency dhe drejtuesit e një prej grupimeve më të mëdha të biznesit me bazë në Doha, Qatar, organizuan një seri intervistash me të rinj nga Shqipëria dhe Kosova. Drejtori ekzekutiv i Al Hazm Mall, Z. Mohammed Al Emadi, deklaroi se të rinjtë shqiptar kanë kualifikimin e kërkuar për pozicionet e ndryshme që ofrohen në kompanitë e tyre, duke u shndërruar në bashkëpunëtorë shumë të mirë.

Sipas Ermal Jauri, CEO i Europe Agency, këta të rinj, në pjesën më të madhe, janë të diplomuar çka shton mundësitë e tyre për karrierë jashtë Shqipërisë. Në këtë takim i pranishëm ishte edhe ministri i mirëqenies sociale Blendi Klosi, i cili tha se i sheh këta të rinj si një aset me vlerë, të cilët në një të ardhme do të  kthehen në Shqipëri e do të investojnë dijet dhe të ardhurat e përfituara jashtë vendit.

Kjo është konferenca e dytë e këtij lloji që Europe Agency zhvillon brenda këtij viti me qëllim rritjen e mundësive të punësimit për të rinjtë shqiptar brenda dhe jashtë vendit.

burimi: syri.net