Qeveria ukrainase ka akuzuar Rusinë se qëndron pas sulmit kibernetik të së premtes ndaj dhjetëra faqeve zyrtare të internetit.
Rreth 70 faqe qeveritare u mbyllën përkohësisht, në sulmin më të madh të ndodhur në katër vite në Ukrainë. Një mesazh që paralajmëronte ukrainasit të “përgatiteshin për më të keqen” u shfaq pak para se faqet të mbylleshin. SHBA dhe NATO dënuan sulmin dhe i kanë ofruar mbështetje Ukrainës. Rusia nuk ka komentuar për këtë ngjarje.
Ekspertët në ministrinë e informacionit të Ukrainës publikuan një plan se si u përhap lajmi për sulmin, duke theksuar se mediat ruse e raportuan atë përpara mediave ukrainase. Ata pretendojnë se sulmet ishin një përgjigje e asaj që ata e quajtën dështimin e Rusisë në bisedimet e saj të fundit me NATO-n mbi Ukrainën.
Ukraina ndodhet nën një presion të madh nga fqinji i saj, me një grumbullim prej rreth 100,000 trupash ruse pranë kufijve të saj. Shërbimi i sigurisë SBU i Ukrainës thotë se vitin e kaluar “neutralizoi” 1200 sulme kibernetike ose incidente në vetëm nëntë muaj.
NATO tha se së shpejti do të nënshkruajë një marrëveshje me Ukrainën për bashkëpunimin e zgjeruar kibernetik, i cili do t’i japë asaj akses në platformën e shkëmbimit të informacionit të malware të aleancës. Shtëpia e Bardhë thotë se do t’i ofrojë Ukrainës çdo mbështetje që i nevojitet për t’u rikuperuar nga sulmi.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
