Një studim i publikuar në revistën Global Change Biology tregon se fermat diellore, nëse menaxhohen mirë, mund të ofrojnë habitat të vlefshëm për bletët bumbuçare, të cilat janë thelbësore për ekosistemet dhe bujqësinë.
Bletët bumbuçare luajnë rol jetik në pllenimin e bimëve të egra dhe kulturave bujqësore, duke ndihmuar në ruajtjen e habitateve natyrore. Megjithatë, popullatat e tyre në Evropë janë në rënie të vazhdueshme për shkak të ndryshimeve klimatike dhe humbjes së habitateve. Një analizë e mëparshme në ‘Nature’ (2023) parashikoi se midis 38% dhe 76% të specieve evropiane të klasifikuara si “me rrezik të ulët” do të humbasin të paktën 30% të territorit të përshtatshëm deri në vitet 2061–2080. Sipas organizatës ‘Bumblebee Conservation Trust’,viti 2024 ishte më i keqi për bletët bumbuçare në Britani.
Fermat diellore si “strehë e fshehtë”
Studimi i ri është i pari që shqyrton rolin e fermave diellore në ruajtjen e biodiversitetit në të ardhmen. Studiuesit analizuan 1,042 ferma diellore funksionale në Britaninë e Madhe, duke ndërtuar një model të detajuar për të simuluar sjelljen e bletëve gjatë kërkimit të ushqimit dhe zhvillimit të popullatave.
Sipas Dr. Hollie Blaydes nga Universiteti i Lancasterit, autorja kryesore e studimit, rezultatet tregojnë se numri i bletëve bumbuçare në këto ferma mund të dyfishohet nëse ato menaxhohen për biodiversitet. Lulëzimi i bimëve të egra brenda fermave ofronte burim të pasur ushqimi në krahasim me sipërfaqet e mbuluara me bar.
Lexo edhe: Xheni Vata: Si u kthye nevoja për ujin e pastër në një vizion sipërmarrës!
Megjithatë, studiuesit theksojnë se efekti pozitiv i fermave diellore kufizohet brenda territorit të tyre dhe se ndryshimet më të mëdha ndodhin në mjediset përreth. Për këtë arsye, ata sugjerojnë një planifikim strategjik për lidhjen e habitateve të bletëve në shkallë më të gjerë.
“Fermat diellore mund të shërbejnë si strehë për bletët bumbuçare sot dhe në të ardhmen, duke zbutur humbjen e habitateve, nëse menaxhohen mirë,” tha Blaydes. “Por ato nuk mund të kompensojnë të gjitha efektet e ndryshimeve të ardhshme të përdorimit të tokës.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
