Kur CEO-ja i Starbucks, Brian Niccol, mori drejtimin e zinxhirit global të kafesë në muajin shtator, inflacioni ishte në rritje, ndërsa trafiku dhe shitjet në dyqane në rënie.
Të mërkurën, drejtuesi 50-vjeçar detajoi planin e tij për të rikthyer Starbucks në pozitat e dikurshme. Modeli i ri i kompanisë, i quajtur “green apron service model”, i fokusuar në mikpritje dhe efikasitet, do ta diferencojë Starbucks nga konkurrentët dhe do të nxisë rritjen e shitjeve, deklaroi Niccol në një intervistë për “Squawk on the Street” në CNBC. “Fatkeqësisht, Starbucks ka qenë e menaxhuar keq për disa vite,” u shpreh ai. “Por jemi me fat që kemi një markë kaq të fortë dhe elastike, ndaj besoj se do të rikuperohemi me programet dhe strategjitë e duhura.”
Javën e kaluar, Starbucks nisi trajnimin e baristëve për modelin e ri të shërbimit, i cili përfshin:
-
uljen e numrit të orëve të punës për çdo dyqan me staf minimal;
-
një sistem “smart queue” që synon dorëzimin e porosive brenda katër minutash;
-
ndërveprime më të personalizuara mes klientëve dhe punonjësve;
-
si dhe prezantimin e artikujve të rinj në menu.
Fokusi i ri në shërbimin ndaj klientit është pjesë e strategjisë “Back to Starbucks”, të cilën Niccol e nisi menjëherë pas emërimit në krye të kompanisë. Të dhënat e publikuara për tremujorin e fundit ishin zhgënjyese, me rënie të shitjeve në dyqanet ekzistuese për të gjashtin tremujor radhazi, një prirje që nisi gjatë mandatit të ish-CEO-së, Laxman Narasimhan. Sipas Niccol, rikthimi tek “themelet operacionale” të biznesit do të shërbejë si bazë për një rimëkëmbje më të shpejtë se sa parashikohet. Disa analistë të Wall Street-it shprehin besim në këtë strategji. “Fokusi në tremujorin e tretë fiskal nuk ishte te rezultatet (që ishin nën pritshmëritë), por te sinjalet që sugjerojnë një ritëm premtues të rikuperimit,” shkruan analistja Sharon Zackfia nga William Blair në një shënim për klientët. Ndërkohë, analisti Andrew Charles nga T.D. Cowen u shpreh optimist në një tjetër analizë se shitjet e Starbucks do të rriten falë një “agjende më agresive të inovacionit”. Niccol njihet për aftësinë e tij për të transformuar kompani në vështirësi. Ai ishte CEO i Chipotle për gjashtë vite para se të kalonte në Starbucks. Gjatë drejtimit të tij, kompania u rikuperua shpejt nga skandalet e sigurisë ushqimore, përmirësoi ndjeshëm shitjet dhe aksionet e saj u rritën me 773%, një rekord për kompaninë. Më parë, gjatë viteve 2015-2018, Niccol ishte në krye të Taco Bell, ku solli risi si porositë përmes aplikacionit në mbarë SHBA-në dhe slogani i njohur i markës “Live Más”. “Jemi pa dyshim përpara pritshmërive në drejtim të rikthimit te baza operacionale,” theksoi Niccol të mërkurën. “Kjo strategji, në fund të fundit, do të sjellë një Starbucks më të mirë.”
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto