Në një kohë kur menaxhimi i zgjuar i parave bëhet vendimtar për sigurinë financiare, të dhënat e fundit tregojnë se Europa mbetet dukshëm pas SHBA-ve për sa i përket investimeve në tregjet e kapitalit. Ndërsa amerikanët tradicionalisht i drejtohen aksioneve dhe fondeve, shumë europianë vazhdojnë t’i mbajnë kursimet në depozita bankare, shpesh duke humbur vlerë përballë inflacionit.
Megjithatë, tabloja brenda kontinentit është shumë më e larmishme. Sipas Association for Financial Markets in Europe (AFME), dallimet mes vendeve anëtare janë të mëdha, si në nivel të investimeve krahasuar me PBB, ashtu edhe për person.
Danmarka, Suedia dhe Holanda…shumë përpara të tjerëve
Indikatori i Investimeve të Familjeve, i përdorur nga AFME, mat se sa nga kursimet e qytetarëve drejtohen drejt instrumenteve të tregjeve të kapitalit, si aksione, fonde investimi, obligacione, sigurime jete dhe fonde pensioni.
Në gjysmën e parë të vitit 2025, vlera totale e aseteve financiare të familjeve në BE arriti në 94% të PBB-së së bllokut. Por brenda vendeve anëtare, diferencat janë ekstreme:
Danimarka dhe Suedia kryesojnë listën me 194% të PBB-së, më shumë se dyfishi i mesatares së BE-së. Holanda ndjek me 164%, ndersa Italia, e katërta në renditje, ka vetëm 119%.
Në skajin tjetër të spektrit, Rumania mbetet shumë poshtë me vetëm 16%, e ndjekur nga Lituania (18%) dhe Bullgaria (20%).
Ndërkohë, Mbretëria e Bashkuar , tashmë jashtë BE-së raporton një nivel prej 122%, duke e vendosur sërish në zonën e performuesve të fortë.
Lexo edhe:Ligji i ri i taksës mbi pronën nis zbatimin në 2028-ën, ja ç’përmban
Çfarë kanë të përbashkëta vendet që investojnë më shumë?
Sipas AFME, vendet që regjistrojnë nivelet më të larta të investimeve ndajnë tre karakteristika kyçe:
Skema të zhvilluara pensioni, që i drejtojnë automatikisht qytetarët drejt investimeve në tregje.
Incentiva fiskale për investime, që i bëjnë produktet investuese më të leverdishme.
Llogari të thjeshta, të përdorshme dhe të orientuara drejt qytetarit, që ulen barrierat për të investuar.
Shembulli më i spikatur është llogaria ISK e Suedisë, e cila lehtëson investimin në aksione, ETF dhe fonde duke thjeshtuar tatimin dhe procedurat.
Vendet që nuk ofrojnë këto elemente zakonisht shënojnë pjesëmarrje të ulët në tregjet e kapitalit, duke orientuar qytetarët drejt depozitave bankare me kthime të ulëta.
Sa investojnë europianët për person?
Përveç raportit ndaj PBB-së, shifrat për person tregojnë edhe më qartë hendekun mes vendeve:
Mesatarja e BE-së: €42,069.
Danimarka: €150,034 për person.
Suedia dhe Hollanda: mbi €100,000 për person.
Luksemburgu: €76,937, duke u renditur i katërti.
Ndërkohë, nëntë vende të BE-së kanë më pak se €10,000 investime në tregje kapitali për person. Këtu përfshihen Rumania, Bullgaria, Polonia, Lituania, Greqia, Letonia, Estonia, Sllovakia dhe Sllovenia.
Në Mbretërinë e Bashkuar, asetet për person arrijnë në €75,463, pothuajse dyfishin e mesatares së BE-së.
Përse ka rëndësi kjo?
Ndërsa BE diskuton reformën e Unionit të Tregjeve të Kapitalit për të nxitur investimet drejt sektorëve strategjikë, këto dallime tregojnë nevojën për politika që rrisin pjesëmarrjen e qytetarëve. Në një ekonomi që po digjitalizohet dhe kërkon financim të vazhdueshëm për inovacion, orientimi i kursimeve drejt tregjeve mund të jetë vendimtar për rritjen afatgjatë.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Mbështetja juaj na ndihmon ta vazhdojmë këtë mision.
Na Suporto
