StartUS Magazine: Komuniteti startup dhe sipërmarrës në Tiranë shumë premtues

Falë kontributit të Vasken Spiru dhe Ergest Nako, dy emra të njohur në fushën e startup-ve,  tashmë revista online “StartUS” ka guidën e startup-ve edhe për Tiranën.

Revista jep hapësirë që çdo qytet të publikojë guidën e tij për startup-et.
Artikulli ka një hyrje tërheqëse “A doni të bëheni pjesë e skenës së startup-ve ndërkohë që e gjeni veten në zemrën plot ngjyra që rreh të Shqipërisë? Atëherë lexoni këtë guidë rreth Tiranës.”

Pasi bën një historik të Tiranës si një kryeqytet i lashtë i Shqipërisë, i themeluar në vitin 1614, artikulli nënvizon se “Tirana është zemra e Shqipërisë që rreh. Ai ka pësuar një transformim të përmasavë të jashtëzakonshme që nga rënia e regjimit komunist në vitet 90-të.”

Më pas, artikulli fton lexuesit të zbulojnë komunitetin e startup-ve në Tiranë. “Megjithëse Tirana nuk është Silicon Valley dhe startup-ët kanë filluar të tregojnë vetveten që 3 vite më parë, qyteti ende ofron një numër të konsiderueshëm aktivitetesh, evente ku realizon kontakte dhe pika ku merr informacion. Komuniteti është shumë energjik dhe udhëhiqet nga aktorë lokalë me reputacion në Tiranë. Gjithashtu, aktorë të rinj dalin në skenë çdo ditë dhe kjo është arsyeja që ne besojmë fort në një të ardhme të shndritshme për komunitetin e startup dhe sipërmarrës në Tiranë,” thotë artikulli.

Më  pas, ai jep një informacion të detajuar për mediat, institucionet, organizatat që ofrojnë informacion dhe organizojnë aktivitete të lidhura ngushtë me startup ku midis shumë të tillave përmendet edhe Business Mag, si e para revistë dixhitale e Infoalbania.al me një përmbajtje origjinale të orientuar nga biznesi.