‘’Sipërmarrësit e së nesërmes’’ njihen me New Media Communication
Përditësuar së fundmi: 07/02/2018

‘’Sipërmarrësit e së nesërmes’’ njihen me New Media Communications

Share
nga Albana Mucaj
Shk 07, 2018

Nje grup nxënësish, pjesë e programit të ‘Sipërmarrësit e së nesërmes në Tiranë’‘, TET po vizitojnë sipërmarrje në kryeqytet, ku njihen me planet e bizneseve, objektivat e kompanive dhe politikat e tyre të menaxhimit.

Gjatë vizitës së zhvilluar në kompaninë ‘’New Media Communications’’ nxënësit vlerësuan me interes organizimin e punës, raportin sipërmarrës punonjës dhe trajtimin social të tyre.

Në prezantimin para sipërmarrësve të së nesërmes, Gerti Boshnjaku, një nga themeluesit e ‘’New Media Communications’’, theksoi parimet e punës dhe kulturën e këtij biznesi. Sipas tij, ‘’punonjësit, krahas promovimit brenda kompanisë, kanë mundësi të zhvillojnë edhe idetë e tyre të biznesit, në bashkëpunim e të mbështetur nga kompania’’.

Eneriko Hajdaraj, facilitator i nxënësve, tregon se programi i cili zgjat 23 javë, që nga nëntori deri në muajin maj u mundëson nxënësve të vizitojnë 30 biznese gjithsej. Janë 15 nxënës të shkollave të mesme në Tiranë që po përfitojnë nga ky program.

Sipas Hajdarajt, ‘’TET u ofron nxënësve mundësinë e të pasurit mentorë personalitete të biznesit. Çdo nxënësi i jepet mundësia të fillojë një biznes të vërtetë me qëllimin për t’i ndihmuar që të përdorin të gjitha burimet për të pasur sukses në ekosistemin e sipërmarrjes në Tiranë dhe më tej’’.

Përgjatë kursit kohor të TET secili nxënës zhvillon dy plane biznesi, (një për biznesin në grup dhe një për atë personal) që u prezantohen bankierëve dhe investuesve. Në përfundim të TET nxënësit paraqesin bizneset e tyre personale në Panairin Final nga Albania’s Business Generation.