Coca-Cola është rikthyer me një tjetër seri reklamash të krijuara me inteligjencë artificiale për sezonin e festave, dhe nuk është mirëpritur nga audienca, pasi mendohet se e largon markën nga mesazhi i saj i ndërtuar prej vitesh që bazën e ka tek familja.
Fushata e re, e titulluar “Holidays Are Coming”, është një rikthim tek reklama ikonike e vitit 1995 dhe është realizuar në bashkëpunim me kompaninë e AI “Silverside AI”, sipas Wall Street Journal, e cila ndihmoi edhe në reklamën e parë festive të kompanisë të gjeneruar nga AI.
Përpjekja e parë e Coca-Cola-s për të krijuar një “homazh” të mjegullt ndaj reklamës origjinale u prit me zemërim dhe tallje vitin e kaluar. Nuk munguan detajet absurde për t’u bërë objekt humori: fytyrat e ngurta dhe të çuditshme të njerëzve, rrotat e kamionëve të Coca-Cola-s që silleshin në drejtime të ndryshme ose nuk rrotulloheshin fare.
Këtë herë, AI i rrotulloi rrotat siç duhet, por duket se kompania nuk i ka besuar më teknologjisë për të krijuar njerëz, pasi fytyrat njerëzore janë pothuajse të padukshme. Në vend të tyre, peizazhet në stilin “Thomas Kinkade” janë të mbushura me kafshë po aq të çuditshme: nga arinjtë polarë deri tek, dhe nuk e dimë pse, slothët, një specie që pothuaj askush nuk e lidh me festat e dimrit.
Lexo edhe: EU4GreenGen /Gonzato: Tranzicioni i gjelbër, prioritet për integrimin e Shqipërisë
Vetëm në versionin “Fantastical” të reklamës shfaqet një fytyrë njeriu: një portret i afërt i një Babagjyshi hiperrealist me një buzëqeshje të çuditshme, dhe një dorë përshëndetëse, gishtat e së cilës deformohen për një moment në forma të pamundura. Më pas shfaqet slogani “Real Magic”. Me pak fjalë, reklama është lehtësisht e dallueshme si produkt i një modeli AI. Lëvizjet janë të çuditshme, njëkohësisht të rrjedhshme dhe të peshëlira, sikur gjithçka të jetë e kapur në gjysmë slow-motion. Çdo skenë duket si një fragment i izoluar, pa asnjë kohezion vizual.
Coca-Cola publikoi edhe një video pas kuintave për mënyrën se si u realizua reklama, e cila duket se është rrëfyer nga dy zëra të krijuar me AI. Pasi mburren se synonin hiperrealizëm, një zgjedhje vërtet e çuditshme kur synon të krijosh ndjesinë e ngrohtë festive, dy narratorët monotonë tregojnë se ekipi ka prodhuar mbi 70,000 klipe video për të arritur versionin final. Tingëllon jashtëzakonisht joefikase. Por për Coca-Cola-n, pjesa me rëndësi është se gjithë projekti mori vetëm një muaj dhe pesë specialistë të AI. Megjithatë, në total, sipas WSJ, rreth 100 persona ishin të përfshirë në fushatën e re. Dhe megjithatë, rezultati është sërish i dobët. Nëse krahasojmë versionin e vitit 2024 me atë të 2025, si një matje e progresit të teknologjisë së AI në krijimin e videove, situata nuk duket aspak premtuese.
Sigurisht, kjo mund të flasë më shumë për qasjen e vetë Coca-Cola-s sesa për gjendjen e teknologjisë së AI. Modelet si Sora 2 i OpenAI dhe Veo 3 i Google kanë bërë hapa gjigantë këtë vit. Megjithatë, edhe ato mund të duken të dobëta kur vendosen në një skenar ku pritet të krijojnë një prodhim filmik të vërtetë, edhe në një format komercial si reklamat. Mjafton të shohim reklamën e parë të Google të krijuar me AI, e publikuar javën e kaluar dhe ndërtuar me modelin e tyre më të avancuar, Veo 3. Ajo përfshin vetëm disa sekonda video të gjeneruara nga AI, të shpërndara në pamje të shkurtra dhe të shkëputura, dhe të krijuara me një stil të mjaftueshëm “cartoon” për të shmangur kritikat.
Në fund na lidh të gjithëve pyetja: nëse markat heqin dorë nga njerëzit për hir të efikasitetit dhe teknologjisë, a rrezikojmë të humbasim pikërisht atë që na bën të lidhemi me to, emocionet e vërteta, ndjenjën e ngrohtësisë dhe kujtimet që vetëm një prekje njerëzore mund t’i krijojë?
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
