Si një shpërthim tragjik në vitin 1917 u kthye në një traditë të Krishtlindjes që vazhdon edhe sot

Çdo vit, kur qyteti i Boston ndez dritat e pemës së Krishtlindjes, kjo nuk është thjesht një ceremoni festive. Pema që zbukuron qendrën e qytetit është një simbol mirënjohjeje dhe miqësie, një dhuratë e veçantë që vjen nga provinca kanadeze Nova Scotia.

Sipas faqes zyrtare të Nova Scotia-s, kjo traditë e rrallë e ka origjinën në një nga tragjeditë më të mëdha të shekullit XX në Amerikën e Veriut: Halifax Explosion. Më 6 dhjetor 1917, dy anije u përplasën në portin e Halifax-it, duke shkaktuar një shpërthim shkatërrues që vrau afro 2,000 persona dhe la qindra të tjerë të plagosur rëndë ose pa strehë. Në ditët pas tragjedisë, qyteti i Bostonit reagoi menjëherë, duke dërguar ndihma mjekësore dhe furnizime emergjente për banorët e Nova Scotia-s. Ky gjest solidariteti la një gjurmë të thellë. “Ne nuk do ta harrojmë kurrë këtë mbështetje dhe këtë mirësi nga njerëzit e Bostonit. Për të thënë faleminderit, provinca i dhuron Bostonit çdo vit një pemë të bukur Krishtlindjeje,” thuhet në faqen zyrtare të Nova Scotia-s. Pema e parë “për Bostonin”, siç njihet sot, u dhurua në vitin 1971.

Lexo edhe: Sa miliona fiton Mariah Carey nga “All I Want for Christmas Is You”?!

Sot, kjo pemë ka edhe profilet e saj në rrjetet sociale, ku ndjekësit mund të përcjellin udhëtimin vjetor nga Kanadaja drejt Shteteve të Bashkuara, duke e kthyer traditën në një histori të gjallë dhe të ndarë me publikun.

Pema e këtij viti mbërriti më 18 nëntor, duke shënuar 54-vjetorin e dhurimit të përvitshëm dhe 108 vite miqësi mes Bostonit dhe Nova Scotia-s. Kryetarja e Bashkisë së Bostonit, Michelle Wu, e priti pemën në qytet, pasi kishte udhëtuar vetë në Kanada për të ndjekur ceremoninë e prerjes së saj. Pema, një bredh i bardhë rreth 45 metra i lartë, u përzgjodh në qarkun Lunenburg.

“Për qeverinë dhe popullin e Nova Scotia-s, jam jashtëzakonisht krenare dhe e nderuar t’ju sjell përshëndetjet e njerëzve të Bostonit dhe mirënjohjen tonë të thellë për këtë dhuratë kaq të veçantë,” tha Wu gjatë ceremonisë, sipas NBC Boston. “Kjo është një traditë e hershme që e mbajmë shumë pranë zemrës sonë në Boston. Jam shumë e lumtur që jam këtu me familjen time për të vizituar Nova Scotia-n për herë të parë dhe për të qenë dëshmitare e kësaj tradite kaq domethënëse.”

Kështu, një tragjedi e thellë e vitit 1917 u shndërrua me kalimin e kohës në një simbol shprese, solidariteti dhe miqësie që vazhdon të ndriçojë Krishtlindjet e Bostonit edhe sot.