Tregu shqiptar i automjeteve po shënon një rritje të ndjeshme të interesit për mjetet elektrike. Gjatë vitit 2025 janë regjistruar gjithsej 6 200 automjete elektrike, dyfish më shumë krahasuar me vitin 2024.
Sipas të dhënave zyrtare të publikuara nga Drejtoria e Përgjithshme e Shërbimeve të Transportit Rrugor (DPSHTRR), numri i mjeteve plotësisht elektrike të regjistruara gjatë vitit që sapo u mbyll është rritur me 98% krahasuar me një vit më parë. Kjo rritje sinjalizon një ndryshim gradual, por të qëndrueshëm, në strukturën e flotës së automjeteve në vend.
Ky ritëm zhvillimi e bën vitin 2025 një nga vitet më domethënëse për përparimin e mobilitetit elektrik në Shqipëri, duke reflektuar një prirje të qartë drejt transportit të gjelbër.
Zgjerimi i përdorimit të mjeteve elektrike përbën një hap konkret drejt reduktimit të ndotjes dhe rritjes së qëndrueshmërisë së transportit rrugor. Kjo prirje mbështetet nga disa faktorë, si kostot më të ulëta të përdorimit krahasuar me mjetet tradicionale me karburant, rritja e ndërgjegjësimit për çështjet mjedisore, si dhe interesimi gjithnjë e më i madh për teknologjitë e reja të transportit.
Në të njëjtën kohë, kjo rritje vë në pah edhe nevojën për zgjerimin e infrastrukturës së karikimit, si dhe për hartimin e politikave publike që nxisin më tej përdorimin e automjeteve elektrike.
Për këto arsye, DPSHTRR e cilëson vitin 2025 si një pikënisje pozitive për të ardhmen e transportit në Shqipëri dhe për përmbushjen graduale të objektivave mjedisore të vendit.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
