Sipas raportit më të fundit të Transparency International, Shqipëria është pozicionuar në vendin e 110 në botë si vendi më i korruptuar në rajon, duke humbur 6 pozicione krahasuar me një vit më parë.
Vitin e kaluar vendi ynë renditej i 104-t në botë, ndërsa këtë vit duket se ka zbritur në vendin e 110-të nga 180 shtete.
Shqipëria renditet si vendi më i korruptuar në rajon, sipas Indeksit të Perceptimit të Korrupsionit, duke u barazuar kështu me Bosnje-Hercegovinën. Kosova renditet në vendin e 87 duke bërë progres nga një vit më parë, ndërsa Mali i Zi pozicionohet në vendin e 64.
Pikët e Shqipërisë janë ulur në 35 nga 36 që ishin vitin e kaluar. Pikëzimi varion në një shkallë nga 0-100, ku 0 i referohet korrupsionit të lartë dhe 100 një shteti të pastër nga fenomeni. Indeksi mat vetëm nivelin e perceptimit të korrupsionit në sektorin publik. Në dekadën e fundit, niveli më i ulët për vendin tonë ka qenë në vitin 2013, ndërsa më i larti në vitin 2016, kur u miratua reforma në drejtësi.
“Në Shqipëri gazetarët vuajnë paditë ligjore dhe kërcënimet, përfshirë kontrollin e tepruar të informacionit që lidhen me përgjigjen ndaj pandemisë. Ndër të tjera, gjatë pandmeisë janë regjistruar edhe shqetësime në lidhje me dhunën policore gjatë protestave, si dhe kufizim i lirisë së grumbullimit”, thuhet në raport.
Kur flasim në nivel global, vendi që është në krye të listës, si shteti me më pak korrupsion është Danimarka, e ndjekur nga Finlanda, Zelanda e Re dhe Norvegjia, ndërsa në fund të listës janë vende si Siria dhe Sudani Jugor.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
