Deklarata e kryeministrit Edi Rama në Kuvendin e Shqipërisë se vendi ynë do të dërgojë dy satelitë në hapësirë ka tërhequr vëmendjen e opinionit publik.
Qeveria shqiptare ka nënshkruar me Turqinë një marrëveshje për të blerë disa dronë pa pilot, të cilët do të monitorojnë territorin e vendit, ndërsa disa prej tyre janë tashmë aktivë.
Për ta zgjeruar edhe më tej luftën kundër krimit të organizuar, mbjelljes së paligjshme të hashashit dhe monitorimin e plotë të territorit në vend, kryeministri u shpreh se satelitët do të jenë “arma e radhës” për të arritur këtë objektiv.
Pohimi i tij ka shkaktuar ilaritet në sallën e Kuvendit, pasi dërgimi i satelitëve në hapësirë është dicka që krahas burimeve monetare kërkon edhe shumë kapacitete të zhvilluara njerëzore. Vendet më të zhvilluara të globit kanë hasur në vështirësitë e tyre për të arritur këtë objektiv, ndërsa në rajonin e Ballkanit Perëndimor asnjë shtet nuk e diskuton këtë. Shqipëria mund të jetë e para, që hapë dhe një garë të re hapësinore në rajon.
Cilat janë shtetet me satelitë në hapësirë?
10 vendet kryesore që po dominojnë industrinë satelitore janë SHBA, Kina, Rusia, Britania e Madhe, Japonia, India, Agjencia Evropiane e Hapësirës, Kanadaja, Gjermania dhe Luksemburgu. Përllogariten rreth 7941 satelitë, pjesa më e madhe e të cilëve i përkasin SHBA. Turqia është një nga 30 vendet që zotëron satelitë. Gjashtë prej tyre janë aktivë, tre satelitë komunikimi dhe tre satelitë vëzhgimi.
Tre të katërtat e satelitëve rrotullohen në orbitë të ulët mes 500 dhe 2000 km lartësi dhe përdoren kryesisht për sistemet e telekomunikacionit, imazhet tokësore ose meteorologjinë.
Më 15 shkurt të vitit të kaluar India theu rekord duke dërguar në hapësirë 104 satelitë përnjëherë. 38% e satelitëve i kushtohen vëzhgimit të Tokës (klimës, reshjeve apo vëzhgimit). 37% e shërbimeve të komunikimit dhe pjesa tjetër për qëllime shkencore, mbrojtje apo teknologjike.
27% e satelitëve lëvizin në orbitë gjeostacionare në një lartësi deri në 36 mijë kilometra që përdoret veçanërisht për shërbimet e komunikimit, që mbeten gjithmonë në të njëjtën pikë dhe orbita e mesme mes 2000 dhe 36 000 km, që përdoret për satelitët e navigimit, siç janë GPS.
Që nga viti 2015 nxisim shpirtin sipërmarrës, inovacionin dhe rritjen personale duke ndikuar në zhvillimin e një mjedisi motivues dhe pozitiv tek lexuesit tanë. Kjo punë që e bëjmë me shumë dashuri nuk ka të paguar. Ne jemi platforma e vetme e cila promovon modelin pozitiv të sipërmarrjes së lirë. Përmes kësaj platforme mbështesim edukimin gjatë gjithë jetës si mjet për zhvillimin personal dhe profesional të brezave. Kontributi juaj do të na ndihmojë në vazhdimin e këtij misioni në gjithë trevat shqipfolëse.
Mund të kontribuoni KETU. Falemnderit.
